Bizi Telegram-da da izləyə bilərsiniz:@xqazeti
Avropa Komissiyası Rusiyaya qarşı 21-ci sanksiya paketini təqdim edib.
XQ xəbər verir ki, bu barədə xarici KİV məlumat yayıb.
Avropa Komissiyasının rəhbəri Ursula fon der Leyen bildirib ki, sanksiyalar dörd sahəni əhatə edir: enerji, maliyyə sektoru və kriptovalyutalar, ticarət və balıqçılıq.
Paket əvvəlcə Avropa Birliyi Şurası tərəfindən yekdilliklə təsdiqlənməlidir.
Məlumata görə, enerji sektorunda əsas məqsəd Rusiya neft gəlirlərini məhdudlaşdırmaqdır. Avropa Birliyi Rusiya nefti üçün maksimum qiymət müəyyən edib. Bu qiymət vaxtaşırı bazara uyğun olaraq tənzimlənir, lakin Hörmüz boğazının bağlanması bu mexanizmin nəzərdə tutulmadığı neft bazarını sarsıdıb. Buna görə də, Aİ bazara sabitləşmək üçün vaxt vermək məqsədilə tənzimləməni yanvar ayına qədər dayandıracaq.
Bundan əlavə, yeni paketə əsasən, "kölgə donanmasına" qarşı sanksiyalar siyahısına daha 30 gəmi əlavə olunacaq, hazırda sanksiyalar altında 632 gəmi var. Sanksiyalar həmçinin "kölgə donanmasına" xidmət göstərən gəmilərə, eləcə də limanlara, hava limanlarına və neft emalı zavodlarına da şamil ediləcək. Maliyyə sanksiyaları siyahısına daha 31 Rusiya bankı əlavə olunacaq.
Avropa Birliyi ilk dəfə olaraq, sanksiya tətbiq edilən Rusiya qurumlarına xidmət göstərəcək üçüncü ölkələrin kriptovalyuta ilə əlaqəli xidmətlərinə tam qadağa qoyacaq.
Ticarət məhdudiyyətləri Rusiya hərbi sənayesində istifadə olunan metallara və ərintilərə də təsir edəcək. Bundan əlavə, Belarusa qarşı ticarət məhdudiyyətləri də tətbiq olunacaq. Yeni sanksiyalar paketi ilk dəfə olaraq Rusiya balıq məhsullarının idxalını məhdudlaşdıracaq. Avropa Komissiyasının məlumatına görə, paket 15 iyul tarixinə qədər təsdiqlənməlidir.
