Elm və Təhsil Nazirliyinin akademik Həsən Əliyev adına Coğrafiya İnstitutunun əməkdaşları Şamaxı və İsmayıllı rayonlarında toponimka üzrə ekspedisiyada olublar.

İnstitutun “Coğrafi fikir tarixi və toponimika” şöbəsinin böyük elmi işçisi Natiq Babayev bu barədə XQ-yə verdiyi açıqlamada bildirib:

– Azərbaycanın siyasi və iqtisadi coğrafiyası şöbəsinin böyük elmi işçisi Nicat İmamverdiyevlə reallaşdırdığımız ekspedisiyanın məqsədi adıçəkilən rayonlara aid olan coğrafi adların yayılma arealını müəyyənləşdirmək, onların müxtəlif mənbələrdə işlənilməsinin, aşkarlanıb üzə çıxarılmasının nominativ təsnifatını vermək, yaranma yollarının xarakterlərinə görə mənimsənilmə potensialını qiymətləndirmək və yeni coğrafi adları müəyyən etmək olub.

Ən qədim insanların məskən saldığı bu yaşayış yerlərində xalqımıza məxsus toponimlərin öyrənilməsi mühüm tarixi, siyasi, elmi və praktiki əhəmiyyət kəsb edir. Ekspedisiya zamanı Şərqi Zəngəzur iqtisadi rayonunda mövcud olan etnotoponimik coğrafi adlar sırasında Şamaxı rayonunun ərazisində də bir sıra paralellərin olduğu müəyyən edilib. Bu da, güman ki, zaman-zaman Şərqi Zəngəzurdan olan soydaşlarımızın məruz qaldıqları köç və deportasiyalarla əlaqədardır. Bu səbəb-nəticə amilini də elmi şəkildə araşdırmağı qərara almışıq.

XQ