Azərbaycan Respublikasının Kino Agentliyinin istehsalına dəstək göstərdiyi “Boşluğa xütbə” filmi 82-ci Venesiya Beynəlxalq Film Festivalının rəsmi proqramına daxil edilib və festivalın “Out of Competition – Fiction” bölməsində nümayiş olunacaq. Filmin rejissoru Hilal Baydarov, icraçı prodüseri isə Orxan Fikrətoğludur.
Filmin istehsalı Azərbaycan Respublikasının Kino Agentliyinin maliyyə dəstəyi ilə baş tutub. Bununla yanaşı, postprodakşn işlərinin yekunlaşdırılması üçün Hilal Baydarovun Meksika səfəri ilə bağlı bütün zəruri xərclər də ARKA tərəfindən qarşılanıb.
Dünyanın ən qədim və nüfuzlu kino tədbirlərindən biri olan Venesiya Film Festivalı Azərbaycan filmlərinin beynəlxalq miqyasda tanıdılması və yaradıcı mübadilənin genişlənməsi üçün mühüm platformadır.
XQ-yə bu barədə eksklüziv açıqlama verən Mədəniyyət nazirinin müşaviri, yazıçı-jurnalist, Əməkdar incəsənət xadimi Orxan Fikrətoğlunun dedikləri:
– İstedadlı rejissor Hilal Baydarovun bu ekran işi Azərbaycan kino tarixində Venesiyada dünya premyerası keçirilən nadir filmlərdən biridir. Poetik üslubda çəkilib və ciddi sənət filmi kateqoriyasına aiddir. Düşünürəm ki, “Boşluğa xütbə”nin Venesiyaya getməsi Azərbaycan kinosu üçün bir mərhələdir. Ümumiyyətlə, bizim milli kinomuz daha çox poetik təfəkkürün, yanaşmanın, zehniyyətin üzərində qurularsa, örnək kimi daha uğurlu olar. Məsələn, cənublu soydaş həmkarlarımızın çəkdikləri kinolar bu yönümlüdür. “Boşluğa xütbə” filmi fərqli Avropa dəyərləri, vizual estetikası, mədəniyyəti üzərindən Azərbaycan dastan yaradıcılığına aid bir filmdir. Ekran əsəri dirilik suyu axtaran bir poetik qəhrəman və insanın gəldiyi fəlsəfi qənaətlər haqqındadır.
Ə.DOSTƏLİ
XQ
