Azərbaycan III MDB Oyunlarında yenidən dünyanın diqqət mərkəzində olacaq
Qafqazın qəlbində, Xəzərin sahilində yerləşən qədim diyar Azərbaycan təkcə tarixi və mədəniyyəti ilə deyil, dostluğun, həmrəyliyin, mədəniyyətlərin qovuşduğu bir mərkəz, beynəlxalq idman tədbirlərinin keçirildiyi möhtəşəm məkan kimi tanınır. Bakı, Gəncə, Naxçıvan və digər şəhərlər təkcə turistləri deyil, dünyanın dörd bir yanından gələn idmançıları və azarkeşləri də özünə cəlb edir. İdman dünyasının xəritəsində xüsusi yer tutan bu diyar idmanı sadəcə yarış deyil, həyat tərzi olaraq təqdim edir. Və bu, hər bir yarışda, tədbirdə bir daha təsdiqini tapır. İdman insanlar arasında körpü salır, millətləri birləşdirir.
Tarixlə müasirliyin, mədəniyyətlə idmanın bir araya gəldiyi Vətənimiz növbəti böyük hadisəyə, III MDB Oyunlarına ev sahibliyi etməyə hazırlaşır. Müxtəlif ölkələrdən gələn idmançılar burada güclərini sınayacaq, birliyi və dostluğu nümayiş etdirəcəklər. Bu oyunlar Azərbaycan üçün həm də bir vitrin olacaq. Çünki dünyanın gözü yenidən bu diyarın üzərində olacaq. İdman arenaları təkcə yarışlarla deyil, həm də mədəniyyətlə, sevgi və sülh mesajları ilə dolacaq. Bakıdan Gəncəyə, Şəkidən Naxçıvana qədər Azərbaycanın hər guşəsi bu tədbirin ruhunu hiss edəcək. MDB Oyunları Azərbaycanda yeni bir səhifə açacaq – bu səhifə birliyin, güvənin və ortaq gələcəyin tarixidir. Və bu tarixin adı Azərbaycanla birgə yazılacaq.
Prezident İlham Əliyev və birinci xanım Mehriban Əliyeva avqustun 20-də Gəncə şəhər stadionunda aparılan tikinti işlərinin gedişi ilə tanış olublar. Dövlətimizin başçısına və birinci xanıma görülən işlər barədə məlumat verilərək bildirilib ki, 1959-1963-cü illərdə inşa edilən Gəncə şəhər stadionu 1964-cü ildə istismara verilib. Son illərdə stadionun tamaşaçı tribunaları yararsız vəziyyətə düşdüyündən və texniki cəhətdən istismarı mümkün olmadığından bu idman qurğusunun fəaliyyəti qismən həyata keçirilirdi. Dövlət başçısının 2023-cü ildə imzaladığı Sərəncama əsasən, Gəncə şəhər stadionunun yenidənqurma işlərinin layihələndirilməsi və həyata keçirilməsi üçün Prezidentin ehtiyat fondundan ilkin olaraq bir milyon manat ayrılıb. Ötən il aprelin 9-da dövlətimizin başçısı stadionun təməlini qoyub.
Qeyd edək ki, bu il sentyabrın 28-dən oktyabrın 8-dək Azərbaycan növbəti böyük idman yarışının keçirilməsi üçün bir neçə şəhər və rayon seçilsə də, MDB Oyunlarının açılış və bağlanış mərasimləri, həmçinin əsas oyunlar Gəncədə baş tutacaq. Bütün bunlar nəzərə alınaraq şəhər stadionunun tikintisində işlər sürətləndirilib. Stadionun ərazisində köməkçi məşq meydançaları və Futbol Akademiyası binası tikilib. Yeni layihəyə görə stadionun ərazisi genişləndirilərək 10,4 hektara çatdırılıb. Nəqliyyat vasitələrinin təhlükəsiz giriş-çıxışı və parklanması ilə birlikdə idman arenasının ümumi sahəsi 12 hektardan çoxdur.
UEFA-nın 4-cü kateqoriya standartlarına uyğun inşa edilən stadionun tamaşaçı tutumu layihə üzrə 15 min 343 yerlikdir. Stadionda fiziki imkanları məhdud tamaşaçılar üçün müvafiq sayda oturacaqlar, media və VIP zonalar mövcud olacaq. Burada, həmçinin futbolçular üçün soyunub-geyinmə, konfrans, tibb, hakimlər, texniki heyət üçün otaqlar və digər zəruri sahələr də müasir səviyyədə qurulur.
Stadionun daxilində bilet satışı, müxtəlif ictimai iaşə obyektləri, avtodayanacaqlar və nəzarət-buraxılış məntəqələri yaradılacaq. Stadion UEFA tələblərinə uyğun işıqlandırma, səs, yayım, internet, havalandırma, təhlükəsizlik və digər zəruri sistemlər ilə təchiz olunur. İdman qurğusunun ərazisində də geniş abadlıq və yaşıllaşdırma işləri həyata keçirilir.
Gəncədə inşa olunan İdman Sarayı bütövlükdə Qafqazda nadir idman kompleksi hesab olunur. Ümumiyyətlə, belə nəhəng idman qurğularının yaradılması Azərbaycanın idman ölkəsi kimi nüfuzunu yüksəltməklə yanaşı, regionlarda yaşayan gənclərin idmana marağının artırılması və idmanın kütləviliyinin təmin edilməsi baxımından mühüm əhəmiyyət daşıyır. Bu layihə, eyni zamanda, ölkəmizin III MDB Oyunlarının yüksək səviyyədə keçirilməsi üçün gördüyü işlərdən biridir. III MDB Oyunları eyni zamanda tarixi Azərbaycan şəhəri olan Gəncənin timsalında ölkəmizin mədəniyyətini, tarixini, idman təcrübəsini təqdim etmək üçün fürsət yaranmış olacaq. Yeri gəlmişkən 2025-ci il üçün MDB-nin “İdman Paytaxtı” seçilmiş Gəncədə sertifikatın təqdimetmə mərasimi də keçirilib.
Müxtəlif idman yarışlarının keçiriləcəyi Gəncə şəhər stadionunun inşası, ilk növbədə, uşaqlar və yeniyetmələr arasında futbola olan marağı daha da artıracaq, futbolla məşğul olmaq istəyənlərə geniş imkanlar yaradacaq. Bölgələrimizdə yeni idman komplekslərinin yaradılması, köhnələrinin əvəzinə müasir idman qurğularının inşası ümumilikdə ölkəmizdə idmanın kütləviliyini təmin etməklə yanaşı, gənc nəslin sağlam yetişməsi baxımından da böyük rol oynayır.
Prezident İlham Əliyev III MDB Oyunlarının 2025-ci ildə Azərbaycanda keçirilməsi üzrə Təşkilat Komitəsinin yaradılması haqqında sərəncamı ötən ilin iyulun 10-da imzalayıb. Ölkə başçımızın bu məsələlərə xüsusi həssaslıqla yanaşmasının nəticəsidir ki, bu vaxta qədər ölkəmizin ev sahibliyi etdiyi bütün idman tədbirləri ən yüksək səviyyədə təşkil olunub. Azərbaycanın növbəti böyük idman yarışına ev sahibliyi etməsi də idman ölkəsi kimi əldə etdiyimiz etimadın nəticəsidir.
Onu da qeyd edək ki, beynəlxalq idman təşkilatlarının rəhbərləri hər zaman yarışlarda nümunəvi təşkilatçılığa görə, Azərbaycan təcrübəsini nümunə kimi qiymətləndirirlər. 2015-ci ildə ilk Avropa Oyunlarına nəzər salaq: Birinci xanım Mehriban Əliyevanın rəhbərlik etdiyi təşkilat komitəsi hazırlıq işlərini ən mükəmməl səviyyədə həyata keçirdi. Bütün Avropa və dünya Azərbaycanın timsalında beynəlxalq idman yarışına mükəmməl ev sahibliyinin nümunəsini gördü. Mükəmməl və çoxnövlü idman infrastrukturu ilk Avropa Oyunlarında olduğu kimi IV İslam Həmrəyliyi Oyunlarında da Azərbaycana yüksək səviyyədə ev sahibliyi etmək imkanı qazandırdı. Bütün müsəlman aləminin təmsil olunduğu bu beynəlxalq idman yarışına da Azərbaycanın ev sahibliyi etməsi ölkəmizə göstərilən böyük etimadın növbəti təcəssümü idi. Prezident İlham Əliyevin xüsusi diqqəti, birinci xanımın bilavasitə rəhbərliyi ilə həyata keçirilən hazırlıq işlərinin nəticəsi olaraq IV İslam Həmrəyliyi Oyunları da Azərbaycanın möhtəşəm uğuru kimi tarixə həkk olundu. Eyni zamanda tamaşaçı auditoriyası bütün qitələri əhatə edən “Formula-1″yarışlarına da ölkəmiz uğurla ev sahibliyi edir. Elə iyun ayında UFC turnirinin ölkəmizdə keçirilməsi də UFC-nin Azərbaycana etimadının təsadüfi olmadığını göstərdi. Bir tərəfdən tədbirin Bakıda yüksək səviyyədə təşkili, azarkeş izdihamı, xarici qonaqların ölkəmizə səfəri, həmçinin UFC kanalları vasitəsilə dünyanın dörd bir yanından on milyonlarla izləyicinin diqqətinin Bakıya yönəlməsi qürur yaşatdısa, digər tərəfdən də idmançılarımızın doğma arenada uğurlu çıxışları azarkeşlərə sevinc hissi bəxş etdi. Bu baxımdan əminliklə deyə bilərik ki, Azərbaycan III MDB Oyunlarını da yüksək səviyyədə, layiqincə keçirəcək.
Sentyabrın 28-dən oktyabrın 8-dək keçiriləcək III MDB Oyunlarına hazırlıqlar son mərhələdədir. Oyunların yüksək səviyyədə təşkili üçün aidiyyətı qurumlar koordinasiyalı fəaliyyət göstərirlər. Bu mötəbər yarışlarda ölkəmiz həm yarışların təşkilatçısı, həm də fəal iştirakçısı olacaq. Ev sahibi olacaq Gəncə — 2025-ci ilin “İdman paytaxtı” elan edilib və yarışların mərkəzi şəhəri olacaq. Yevlax, Mingəçevir, Qəbələ, Şəki, Göygöl və Xankəndi — ümumilikdə 7 şəhərdə 12 idman məkanı aktiv istifadə ediləcək. İdmançılar 23 müxtəlif peşəkar idman növü üzrə medallar uğrunda mübarizə aparacaqlar. Onların arasında güləş (sərbəst, yunan-Roma, qadın), boks, cüdo, taekvondo, könüllü və zirzəmi idmanları (badminton, voleybol 3×3, futbol U‑16, üzgüçülük, stend atıcılığı, çövkən, batut gimnastikası, kamandan oxatma, stolüstü tennis və s.) var.
Qeyd edək ki, 23 idman növü üzrə 1 659 idmançı, 2 385 nəfərlik nümayəndə heyəti qeydiyyata alınıb. Ümumilikdə, 5500-ə qədər iştirakçının yarışda iştirak edəcəyi planlaşdırılır və MDB olmayan ölkələrin nümayəndələri də dəvət əsasında qatılacaqları gözlənilir. Təxminən 246 medallar dəsti oynanılacaq, bunlardan ən çox – 40 medal – üzgüçülük idmanında olacaq.
Nəticə olaraq deyə bilərik ki, III MDB Oyunları 2025 yarışları Azərbaycanın beynəlxalq idman aləmində nüfuzunu daha da artıracaq. Ev sahibliyi Azərbaycan üçün idman, mədəniyyət və diplomatiya sahəsində daha bir strateji uğur olacaqdır.
Nurəngiz Adilqızı
XQ
