Özbəkistanın Müstəqillik Günü münasibətilə “Yeni Özbəkistan” parkında təntənəli bayram tədbiri keçirilib.
Tədbirdə Özbəkistan prezideni Şavkat Mirziyoyev, Hökumətin, Senatın və Ali Məclisin üzvləri, səfirlər və beynəlxalq təşkilatların təmsilçiləri, elm, mədəniyyət və incəsənət xadimləri, ictimaiyyətin nümayəndələri iştirak ediblər. Tədbirə qatılanlar arasında Azərbaycanın Özbəkistandakı səfiri Hüseyn Quliyev və paytaxtdakı diasporumuzun üzvləri də olub.
Özbəkistan Prezidenti Şavkat Mirziyoyev Müstəqillik Günü münasibətilə ölkədə yaşayan xalqları təbrik edib, onlara uğurlar arzulayıb.
Prezident müstəqilliyin əldə olunduğu 34 il ərzində ölkə həyatında böyük irəliləyişlərin əldə edildiyini bildirib.
Dövlət başçısı qeyd edib ki, Özbəkistan dünya birliyində öz layiqli yerini tutub, Yeni Özbəkistanın yaradılması ideyası əsasında başlanmış genişmiqyaslı islahatlar sayəsində hər bir soydaşımız müstəqilliyin bəxş etdiyi hüquq və azadlıqları əməli şəkildə hiss edir. Məhz bu ideya sayəsində biz üç min illik tariximizi, zəngin mədəniyyətimizi, Birinci və İkinci İntibah ənənələrini dirçəltdik və Üçüncü İntibah istiqamətində inamla əməli addımlar atırıq. Son illərdə ixracın həcmi 26 milyard dollara çatıb, qızıl-valyuta ehtiyatları ilk dəfə olaraq 48 milyard dolları ötüb. Ölkəyə 130 milyard dollara yaxın xarici investisiya cəlb edilib.
Tədbir boyu monitorda Şavkat Mirziyoyevin Azərbaycana səfərləri, Türkmənistanın Türkmənbaşı şəhərində Azərbaycan Prezidenti İlham Əliyev, Türkmənistan Xalq Məsləhətinin sədri Qurbanqulu Berdiməhəmmədov və Özbəkistan Prezidenti Şavkat Mirziyoyevin görüşlərini əks etdirən videomateriallar nümayiş etdirilib.
Bayram tədbiri Özbəkistan incəsənət ustalarının böyük konsert proqramı ilə başa çatıb.
Konsertdə Azərbaycan, türk, özbək, qazax, qızğız, türkmən dillərində mahnılar səslənib. Tamaşaçılar “Qarabağ” mahnısını alqışlarla qarşılayıblar.
Qulu Kəngərli
XQ-nin Türküstan üzrə xüsusi müxbiri
Daşkənd
