Gəncə şəhərində sakinlər və turistlər üçün pulsuz internetə çıxış imkanları yaradılır. Gəncə Şəhər İcra Hakimiyyətinin təşəbbüsü və “Xlink” MMC-nin icrası ilə həyata keçirilən layihə mərhələli şəkildə reallaşdırılır.

İlkin olaraq, Heydər Əliyev adına Mərkəzi Meydanda simsiz internet şəbəkəsi istifadəyə veriləcək. Sentyabr ayının sonunadək YAP Gəncə şəhər təşkilatının inzibati binası qarşısında və Heydər Əliyev Mərkəzinin ətrafında da pulsuz Wi-Fi xidmətinə giriş mümkün olacaq.

Layihənin növbəti mərhələsində isə “Xan bağı” istirahət parkı, “Gəncəçay” Park-Bulvar Kompleksi və şəhərin digər istirahət məkanları da ödənişsiz internetlə əhatə olunacaq. Bütün işlərin cari ilin sonunadək başa çatdırılması nəzərdə tutulur.

Şəbəkə istifadəyə verildikdən sonra ilk bir ay ərzində istifadəçilər heç bir qeydiyyat olmadan birbaşa qoşula biləcəklər. Test mərhələsi başa çatdıqdan sonra isə Wi-Fi şəbəkəsindən istifadə yalnız xüsusi proqram təminatı vasitəsilə qeydiyyatla mümkün olacaq.

Hamlet Qasımov
XQ-nin bölgə müxbiri
Gəncə