Göygöl rayonunda təşkil olunan ikinci Moruq Festivalının ikinci günü həm yerli sakinlər, həm də qonaqlar üçün əsl bayram ab-havasında keçdi. Tədbir boyu kənd təsərrüfatı məhsullarının sərgisi, yerli fermerlərin təqdimatları, əl işləri yarmarkası və mədəniyyət proqramları ilə festival əsl kənd həyatının, əməksevərliyin və təbiətin gözəlliyinin nümayişinə çevrildi.
Səhər saatlarından başlayaraq festival ərazisinə axın edən ziyarətçilər yalnız moruğun dadına baxmaqla kifayətlənmədilər, müxtəlif yarış və interaktiv tədbirlərdə də iştirak etdilər. Uşaqlar üçün təşkil olunan oyun zonaları və moruq mövzusunda keçirilən rəsm müsabiqəsi xüsusilə böyük maraqla qarşılandı.
Festivalın ən çox diqqət çəkən hissələrindən biri moruqdan hazırlanmış məhsulların təqdimatı oldu. Yerli şirniyyatçılar və evdar qadınlar tərəfindən hazırlanan moruq mürəbbələri, kompot, piroq və digər təamlar ziyarətçilərin zövqünü oxşadı. Yerli musiqi qruplarının səhnə çıxışları isə tədbirə xüsusi ovqat qatdı.
Festival çərçivəsində çıxış edən Göygöl Rayon İcra Hakimiyyətinin nümayəndələri və kənd təsərrüfatı mütəxəssisləri bu kimi tədbirlərin regionun iqtisadi və mədəni inkişafında mühüm rol oynadığını vurğuladılar.
Topalhasanlı kəndindən olan moruq istehsalçısı Validə Hacıyeva festivalın yaranma ideyasından danışaraq bildirdi:
“Moruq festivalı” sözünü ilk dəfə bizim kənddə səyyar görüş zamanı rayon icra hakimiyyətinin başçısı Elvin Paşayevdən eşitdim. Dedi ki, nə üçün bu əvəzsiz giləmeyvənin bayramını təşkil etməyək, onun şöhrətini hər yerə yaymayaq? Axı rayonda hara baxırsan, moruq var. Sonra da keçən il ilk festival keçirildi. Bilirsiniz fermerlər nə qədər sevinir?! Sağ olsun rayon rəhbərliyini, dəstək verən digər qurumları — biz Göygölün simasını, ənənəsini, təbiətini göstərə bilirik.”
Festival, eyni zamanda, rayonun turizm potensialını tanıtmaq və Göygölü daha geniş auditoriyaya təqdim etmək baxımından da əhəmiyyətli platformaya çevrilib.
İkinci Moruq Festivalının ikinci günü bir daha sübut etdi ki, Göygöl təkcə füsunkar təbiəti ilə deyil, zəngin kənd təsərrüfatı və mədəni irsi ilə də Azərbaycan kənd həyatının ən gözəl nümunələrindən biridir.
Hamlet Qasımov,
XQ-nin bölgə müxbiri,
Göygöl rayonu
