Azərbaycan Respublikası Dövlət Məşğulluq Agentliyinin Azərbaycan Milli Kulinariya Assosiasiyasındakı “aşbaz” və “qənnadci,şirniyyatçı” ilk peşə hazırlıq kurslarında Qeyri-Hökumət Təşkilatlarına Dövlət Dəstəyi Agentliyinin dəstəyi ilə “XIX əsr İrəvan mətbəxi” Qrant layihəsinin təqdimatının nəzəri hissəsi keçirildi. Təqdimatda çıxış edənlər, həmçinin QHT-lərə Dövlət Dəstəyi Agentliyinin dəstəyi ilə nəşr olunmuş “Qərbi Azərbaycanın şirin inciləri”, 2021-ci ildə Parisdə Dünyanın ən yaxşı kitabı adını almış və ingilis dilində nəşr edilmiş “İrəvan xanlığı bölgə mətbəxi” kitablarından danışdılar. AMKA-nın prezidenti Tahir Əmiraslanov çıxışında ölkə Prezidentinin rəhbərliyi ilə Qərbi Azərbaycana böyük qayıdışa hazırlıq getdiyini qeyd etdi və bildirdi ki, Qarabağa qayıdışda olduğu kimi bu qayıdışda da öz dədə-baba yurduna yalnız əhalimiz deyil, həm də mədəniyyətimiz və mədəniyyətimizi qoruyan, özündə əks etdirən milli mətbəximiz də qayıdacaq.
Başqa qonaqlar - “Qərbi Azərbaycanın şirin inciləri” kitabının əsas mənbələrindən olan Elmira Hüseynova və qənnadçı-şirniyyatçı kursun müəllimi Leyla Rəhimli öz ürək sözlərini bildirərək, Qərbi Azərbaycan mətbəxinin əsas xüsusiyyətlərindən söz açdılar.
Tədbirdə Qeyri-Hökumət Təşkilatlarına Dövlət Dəstəyi Agentliyinə və Prezident Administrasiyasına bu işə göstərdikləri diqqətə və AMKA-ya göstərdikləri yüksək etimada görə təşəkkür bildirildi.
Aşpazlıq kurslarının müəllimi, Əməkdar Mədəniyyət İşçisi “İrəvan xanlığı bölgə mətbəxi” kitabının müəlliflərindən biri Oruc Əliyev XQ-yə danışdı: - Mən özüm İrəvanın Zəngibasar bölgəsində doğulmuşam. Gənclik illərindən bu günə kimi bu sahədə 50 ildən çoxdur işləmişəm. Tahir müəllimlə də 35 ildir bir yerdəyik. Düşünürəm ki, bu kitabı ərsəyə gətirməyimiz mətbəx mədəniyyətimiz üçün böyük uğurlardan sayılır. Mənim də çoxdankı arzum idi ki, İrəvan mətbəxinin yemək, şirniyyat və digər reseptlərini bir yerə toplayaq. Belə bir təklif gəldi. Çox şad oldum. Tahir müəllimin də köməkliyi ilə İrəvan bölgəsindən olan bir çox insanlardan həmin reseptləri götürdük. Daha da təkmilləşdirdik. Öz bildiyimiz reseptləri də bura əlavə etdik. Təxminən, bu işə 2010-cu ildən başlamışıq. 2020-ci ildə isə İrəvan mətbəxinə aid ilk kitab işıq üzü gördü. Pandemiya dövrünə təsadüf etdiyi üçün kitabın təqdimatını keçirə bilməmişdik. Sonra, ingilis dilində ikinci kitab “İrəvan xanlığının bölgə mətbəxi” nəşr olundu. Araşdırmalar Mərkəzində kitabın geniş təqdimatı oldu. 1500 nəfərlə müsahibə aparılaraq, çoxsaylı tarixi, etnoqrafik və digər elmi mənbələri araşdırıldı. Nəticədə, 413 xörək nümunəsi toplanıb, onların texnoloji təhlili aparılıb, reseptlər texnoloji, tarixi, coğrafi və etnoqrafik baxımdan dəqiqləşdirilərək hazırlanıb fotoşəkilləri çəkildi. İrəvan mətbəxinə dair tədqiqatlar kitabın 74 səhifəsində, xörək reseptləri isə 389 səhifədə yer alıb. Kitabın sonunda 5-dən çox dəqiq resept təqdim etmiş 64 respondentin siyahısı da verilmişdir.
Qeyd edək ki, iyulun 17-də müdavimlər layihənin təcrübə hissəsində iştirak edəcəklər və onlara sertifikatlar təqdim olunacaq.
Fidan SALMANOVA
XQ
