Bakı Şəhər Mədəniyyət Baş İdarəsinin tabeliyində olan Xəzər rayonunun  Şüvəlan qəsəbə Mədəniyyət evində Dünya Azərbaycanlılarının Həmrəylik Günü və Yeni il bayramına həsr olunmuş tədbir keçirilib. 

XQ xəbər verir ki, tədbirdə “Səma”  rəqs ansamblının təqdimatında “Uşaqların  Həmrəyliyi – Dünyanın Ümididir” adlı konsert proqramı təşkil olunub.

Konsertdə “Səma”  rəqs ansamblının ifasında Azərbaycanın, eləcə də müxtəlif dünya xalqlarının rəngarəng milli rəqsləri nümayiş olunub.

Tədbirdə çıxış edən 14 saylı Xəzər-Pirallahı seçki dairəsi üzrə millət vəkili, Milli Məclisin deputatı, Mədəniyyət komitəsinin sədr müavini Günay Əfəndiyeva “Səma” rəqs ansamblının yaradıcılıq fəaliyyətini yüksək dəyərləndirib. Günay Əfəndiyeva kollektivin bədii rəhbərliyini və üzvlərini peşəkar ifaları münasibətilə təbrik edərək bildirib: “Bu gün bu səhnədə uşaqlarımız hər bir rəqs nömrəsini böyük sevgi ilə nümayiş etdirdilər. Bu sevgi əslində öz mədəniyyətinə, öz incəsənətinə, öz milli dəyərlərinə olan sevgidir. Eyni zamanda uşaqlarımızın həm də digər xalqların mədəniyyətinə hörmət ruhunda yetişməsinin, ümumbəşəri dəyərlərə bağlılığının bir ifadəsidir”.

Deputat bu cür yaradıcılıq layihələrinin davamlı olmasının gənc nəslin milli irsə sahib çıxmasına, Azərbaycanın mədəni inkişafına töhfə verdiyini vurğulayıb. 

Günay Əfəndiyeva “Səma” rəqs ansamblına yaradıcılıq uğurları arzulayıb və kollektivin gələcək mədəni təşəbbüslərinə dəstəyini ifadə edib. 

Tədbirdə Xəzər Rayon İcra Hakimiyyəti başçısının müavini  Lalə Əhmədova, Bakı Şəhər Mədəniyyət Baş İdarəsinin nümayəndələri S. Məmmədova, Ş. Cəbiyeva çıxış edərək, belə mədəni tədbirlərin gənc nəslin yaradıcılıq potensialının üzə çıxarılmasında, milli-mənəvi dəyərlər ruhunda formalaşmasında əhəmiyyətini vurğulayıblar. 

Tədbirin sonunda birgə xatirə şəkli çəkilib.