MDB-nin “Gənclər paytaxtı” tarixi günlər yaşayır

Qəbələ şəhəri bir neçə gündən sonra III MDB Oyunlarına ev sahibliyi edəcək şəhərlərimizdən biridir. Mənim üçün ikiqat sevindirici faktdır ki, həmin mötəbər idman yarışlarının açılış və bağlanış mərasimləri doğulub böyüdüyüm Gəncə şəhərində olacaq, bir sıra oyunlar isə bölgə müxbiri olduğum Qəbələ, Şəki, Mingəçevir və Yevlaxda keçiriləcək. 

Hələ bir neçə ay əvvəldən məlum idi ki, Qəbələ Olimpiya İdman Kompleksi sentyabrın son 3 günündə stolüstü tennis­çilərin, oktyabrın 3-dən 7-dək badminton­çuların, Qəbələ Şəhər Stadionu sentyabrın 28-dən etibarən bir həftə 16 yaşadək fut­bolçuların, Qəbələ Atıcılıq Klubu isə okt­yabrın 3-dən 6-dək stend atıcılarının ixtiya­rına veriləcək.

Bu anonsları qələmə almaq və ya dilə gətirmək olduqca asan məsələdir. Ancaq 11 ölkənin idman ictimaiyyətlərini təmsil edən çoxsaylı qonaqların, mətbuat təm­silçilərinin və həmin mötəbər yarışların keçirildiyi günlərdə ölkəmizə gələcək tu­ristlərin hamısının yerləşdirilməsi, otel, iaşə ocaqları, istirahət mərkəzləri və digər sosial strukturların beynəlxalq standartlara cavab verən şəkildə hazırlanması o qədər də asan məsələ deyildi. 

Son 6–7 ayda Qəbələdə bu istiqamət­də həyata keçirilən tədbirlərin miqyasını təsəvvür etmək belə çətindir. Ancaq həm­söhbətim məsul vəzifəli şəxslər dedilər ki, Qəbələ III MDB Oyunlarına ev sahibliyi etməyə tam hazırdır. 

40 il unutmadığım müəllim tövsiyəsi 

Universitet müəllimimiz – sonralar mən onun baş redaktor olduğu “Bakı” qəzetində də çalışmışdım – mərhum Nəsir İmanquli­yev deyirdi ki, jurnalist məqalə hazırlamaq üçün birbaşa müəssisə rəhbəri ilə görüş­məyə çalışırsa, onun yazısı uğurlu olmaya­caq: “O yazı uğurlu alınır ki, müəllif get­diyi ünvanda hansısa maraqlı faktla və ya həmsöhbətlə rastlaşır və yazını rəhbərliyin verdiyi hesabat üzərində deyil, məhz həmin fakt əsasında qurur”. Təvazökarlıqdan uzaq olsa da, mən həmişə mərhum müəllimimi­zin həmin tövsiyəsinə əməl etmişəm. Elə bu yazının qələmə alınmasından da rayon rəhbərliyinin xəbəri yoxdur. 

Doğrudur, Səbuhi Abdullayev mətbua­ta, xüsusən, “Xalq qəzeti”nə daim hörmətlə yanaşır. Elə biz jurnalistlər də onun müasir tərəqqi və inkişaf yolunda olan ölkəmizin adına layiq göstərdiyi fəaliyyətini diqqət­dən kənarda qoymuruq. Ancaq indi həm onun gündəlik iş qrafikinin çox sıx olduğu­nu nəzərə alaraq, həm də Nəsir müəllimin tövsiyələrinə ehtiram olaraq, eləcə şəhəri gəzib-dolaşmaqla yazı hazırlamağı məqsə­dəuyğun saydım. 

Yollar, a yollar... 

Köhnə dostum Mansur Orucovla bir axşamüstü Nohur gölünün sahilində çay içmək istədik. Yeri gəlmişkən, bir dəfə bu rayonun Çarxana kəndindən olan ağsaqqal həmkarımız Telman Heydərovdan soruş­muşdum ki, Nohur sözü də göl mənası verirsə, “Nohur gölü” nə deməkdir? Ma­raqlı cavab vermişdi: “Həmin su hövzəsi 1949-cu ildə əkin sahələrinin suvarılması məqsədilə kiçik çayların qarşısı kəsilərək yaradılmışdı. İki dağın arasında süni göl yaradan Stalin hökuməti ona nə ad verəcə­yini kimdən soruşardı ki?”.

Qərəz, Mansura dedim ki, Qəbələ son 20 ildə təsəvvüredilməz dərəcədə inkişaf edib: “Qəbələnin tarixi haqqında yazan alimlər qeyd edirlər ki, bu şəhər orta əsr­lərdə karvan yolunun üstündə idi. İndi isə bu şəhər üç istiqamətdən – İsmayıllıdan, Ağdaşdan və Oğuzdan – gələn mükəmməl avtomobil yollarına, sürət qatarlarının şütü­düyü müasir dəmir yoluna, ən böyük təy­yarələrin belə rahatlıqla enib-qalxdığı hava limanına malikdir. Yəni su yolundan başqa bütün yollarınız var. 

İlyas sanki “su yolundan başqa” ifa­dəsini gözləyirdi. Dərhal göldəki sayı on­larca olan, hamısını da turistlərin “idarə etdiyi” qayıqları göstərdi: “Bəs bu su yolu deyil?”. Söhbətimizi qonşu stolda əyləş­miş ağsaqqal da eşidirmiş. O, “Üstəlik, dağların üstündən Dağıstana at yolu da var. Hələ dağların belinə dolanan Kanat yolunu demirəm”– deyərək fikirlərimizi tamamladı. 

Polad Həşimov küçəsində... 

Hər dəfə bu küçədən keçəndə heç za­man unutmayacağım iki fakt yadıma düşür. Birincisi fakt cənab Ali Baş Komandan İlham Əliyevin rayon icra hakimiyyətinin başçısı Səbuhi Abdullayevə verdiyi tapşırıq idi:

“Mən mərhum generalın anası ilə da­nışmışam, ona başsağlığı vermişəm. Onun Vəndam kəndində, Qəbələ rayonunda ya­şayan qohumlarına xüsusi diqqət göstə­rilməlidir. Bilirəm ki, diqqət göstərirsiniz. Daim diqqət mərkəzində olmalıdır. Onun yaxınları, övladları dövlət tərəfindən qayğı ilə əhatə olunur. Müdafiə nazirinə və digər aidiyyəti qurumların rəhbərlərinə müvafiq göstərişlər verilmişdir. General uzun müd­dət Sumqayıtda yaşamışdır və buna görə Sumqayıtın icra başçısına da göstəriş veri­lib. Siz də burada general Həşimovun adı­nın əbədiləşdirilməsi ilə əlaqədar müvafiq addımlar atmalısınız!”.

Xatırladım ki, Səbuhi müəllim döv­lət başçımızın həmin tapşırığından dərhal sonra şəhərin ən gözəl küçələrindən birinə mərhum generalın adının verilməsini təmin etmişdi. 

Unuda bilmədiyim ikinci faktı isə təva­zökarlığa ehtiyac duymadan yada salıram. 4–5 ilin söhbətidir. Sosial şəbəkələrdə həbs edilmiş bəzi məmurların sayı-hesabı bilin­məyən mülkü, əmlakı, sərvəti, var-dövləti haqqında çoxsaylı materiallar tirajlanırdı. Heç biri də yalan, iftira deyil, hamısı rəsmi materiallar idi. Belə bir zamanda Zaqatala­dan redaksiyaya, qəbələli əməkdaşımız İtti­faq Mirzəbəyliyə zəng edərək soruşdum ki, Polad Həşimovun sərvətlərindən nə üçün yazmırsınız? 

İstənilən mövzu və eyhamı maraqlı bir yazıya çevirə bilən həmkarımız mənim həmin atmacamın cavabını “Facebook”­da necə verdisə, 2–3 günə 30 mindən çox “bəyənmə” oldu. İ.Mirzəbəylinin həmin yazısını 30-dan çox sayt, bir o qədər də so­sial şəbəkə fəalı paylaşdı. Mən indi həmin yazını məhz müəlifin “Facebok” səhifəsin­dən yox, “Xüsusi Təyinatlı Polis Dəstəsi, XTPD, OMON” adlı “facebook” istifadəçi­sinin səhifəsindən götürüb təqdim edirəm: 

20 İyul 2020-ci il. Sözün bitdiyi yer 

Bölgə müxbirimiz İlqar Həsənov Zaqataladan zəng eləmişdi. Soruşdu ki, General Həşimovun sərvətlərindən nə üçün yazmırsınız?

Cin atına mindim:

– Onun nə sərvəti var idi, nə danışırsı­nız?

– Var – dedi, – istəyirsən sayım.

Sonra saydı: 

– Onun sərvətləri – gendən gələn namus, azərbaycanlı qeyrəti, Türk vic­danı, qəbələli səmimiyyəti, vəndamlı lə­yaqəti, zabit şərəfi, Ali Baş Komandana sədaqət, Vətənə məhəbbət, tabeçiliyində olan hərbçilərə diqqət, silaha sevgi, hər­bi biliklərə maraq, cəmiyyət qarşısında məsuliyyət, anasının qarşısında İbadət... Yenə də sayım?

Dedim, yox, bəsdir. Sonra isə öz-ö­zümə sual verdim: 

– Cavan bir adam bu qədər sərvəti necə toplaya bilib?

Təsəllimiz odur ki, oliqarx milyoner­lərin qazandığının hamısı bu dünyada qalır, Polad Həşimovun qazandıqları isə həm bu dünyada qaldı, həm də o biri dün­yaya apara bildi”.

...Jurnalist Şəlalə Məhyəddinqızı bil­dirmişdi ki, həmin yazını biz də Dövlət Radiosunun saytında paylaşdıq və qısa müddətdə 20 mindən çox “bəyənmə” gəl­di. Bu, mənim və yazı müəllifinin hünəri yox, mərhum generala olan el məhəbbə­tinin göstəricisi idi. Məhz həmin general Qəbələ camaatına “Polad ürəkli insan­lar” adı qazandırıb. 

Dünya musiqiçiləri 14-cü dəfə Qəbələdə

Qəbələnin bu il böyük məsuliyyətlə ha­zırlaşıb, uğurla başa çatdırdığı beynəlxalq tədbirlərdən biri də Heydər Əliyev Fondu­nun təşəbbüsü və təşkilatçılığı, Azərbaycan Respublikasının Mədəniyyət Nazirliyi, Üzeyir Hacıbəyli adına Bakı Musiqi Aka­demiyası və “Gilan”ın dəstəyi ilə keçirilən dahi bəstəkar Üzeyir Hacıbəylinin 140 il­lik yubileyinə həsr olunmuş XIV Qəbələ Beynəlxalq Musiqi Festivalı idi. İyulun son günlərində başa çatan həmin festival bu dəfə də möhtəşəmliyi ilə musiqisevərlərin diqqətini Qəbələyə cəlb edə bilmişdi. 

Musiqi ictimaiyyətimizin təmsilçiləri və əcnəbi sənət adamları festival çərçivə­sində Üzeyir Hacıbəyli adına Azərbaycan Dövlət Simfonik Orkestrinin iştirakı ilə ta­maşaçılara “Viva opera” konsert proqramı təqdim etmişdilər. Əvvəlcədən elan edil­mişdi ki, bu konsert görkəmli musiqi xa­dimləri Vasif Adıgözəlovun 90, Rauf Ataki­şiyevin 100 illik yubileylərinə həsr olunub. 

İyulun əvvəlində isə ...

Bəxt mənim həmin gün Qəbələdə ol­mağımı “təmin eləmişdi”. İyulun 2-də Azərbaycan Respublikası Gənclər və İd­man Nazirliyinin və Qəbələ Rayon İcra Hakimiyyətinin birgə təşkilatçılığı ilə “Qə­bələ – MDB-də Gənclər paytaxtı – 2025” beynəlxalq proqramının açılış mərasimi ke­çirilirdi. Xatırladaq ki, 2023-cü ildə MDB Hökumət Başçıları Şurasının Daşkənddə keçirilən iclasında Qəbələ şəhəri 2025-ci ildə MDB-nin “Gənclər Paytaxtı” elan olu­nub.

Şəhərdəki Heydər Əliyev Konqres Mərkəzində təşkil olunan tədbirdə Gənclər və idman nazirinin müavini İndira Hacı­yeva, MDB baş katibliyinin üzvü Tatyana Kovalevanın və rayon icra hakimiyyətinin başçısı Səbuhi Abdullayevin çıxışları ma­raqlı idi. Ancaq biz jurnalistlər üçün daha diqqətçəkən məqam Səbuhi müəllimin məlumat verdiyi başqa bir məsələ olmuş­du. Rayon rəhbəri demişdi ki, Qəbələ bu il həm də Azərbaycanda “İdman paytaxtı” se­çilib. Doğrudan da, bütün bunlar fəxr edil­məli faktlardır. 

20 nəfər Qarabağ Universitetinə qəbul olunub

Ulu öndər Heydər Əliyev uşaqlar və gənclərlə istənilən görüşdə deyirdi ki, ölkə­mizin sabahını siz quracaqsınız. Bunun üçünsə yaxşı oxumalı, savadlı olmalısınız. Həmin tezisi qəbələli abituriyentlərin builki qəbul imtahanlarında qazandığı nailiyyət­lərlə tanış olanda xatırladım. Öyrəndim ki, bu il rayon üzrə 57 nəfər məzun qəbul im­tahanlarında 600-dən yuxarı bal toplayıb.

Başqa bir faktda isə qeyd edilir ki, 2024-2025-ci tədris ilində rayonun ümumtəhsil müəssisələrini tam orta təhsil səviyyə­si üzrə bitirən 1210 nəfər məzundan 101 nəfəri fərqlənmə attestatına, 1 nəfəri qızıl nişana, 1 nəfəri isə gümüş nişana layiq gö­rülüb. Buraxılış imtahanında 3 nəfər şagird maksimum nəticə göstərib. Ali məktəblərə sənəd verən 750 nəfər məzundan 584 nəfər ölkənin müxtəlif ali məktəblərinə, o cümlə­dən 20 nəfər Qarabağ Universitetinə qəbul olunub. 57 nəfər məzun qəbul imtahanla­rında 600-dən yuxarı, 86 nəfər məzun isə 500-600 arası bal toplayıb. 

Həftənin I günü Zalamda, 2 gün sonra isə Tikanlıda ...

Səbuhi Abdullayev, sözün həqiqi məna­sında, öz vəzifə borcunu kabinetdə oturaraq icra edən məmurlardan deyil. Rayonda o qədər beynəlxalq tədbirlərin keçirilməsinə baxmayaraq, icra başçısı hər həftə iki kənd­də səyyar qəbul təşkil edir. Elə keçən həftə­nin əvvəli Zalamda, sonra isə Tikanlı kən­dində keçirilmiş səyyar qəbulların arasında icra hakimiyyətinin binasında da vətəndaş qəbulu var idi. Bu bir daha təsdiq edir ki, rayonda sakinlərin problemləri daim diqqət mərkəzində saxlanılır, vətəndaşların sözü, səsi daim dinlənilir. 

Su gələn arxa bir də gələr, çaylara da həmçinin

İstənilən ictimai-siyasi məzmunlu fəa­liyyətə, beynəlxalq tədbirlərə, festivallara baxmayaraq, Qəbələ ənənəvi kənd təsərrü­fatı rayonudur. Bu il rayonun kümçüləri də özünəməxsus uğurlara imza atıblar, taxılçıla­rı da, meyvəçiliklə məşğul olan fermerləri də. Yeri gəlmişkən, həmsöhbətim Nəriman dayı dedi ki, quraqlıqlara görə bu il fındıq məhsu­lu ötənilkindən az olacaq. Ancaq eybi yox, su gələn arxa bir də gələr, çaylara da həmçinin. Bu gün, sabah yağışlar başlayacaq, gələn il üçün bol məhsulun təməli qoyulacaq. 

Həmsöhbətimin “yağışlar başlayacaq” deməsi bir şair dostumuzun qocalıqdan şi­kayətlə qələmə aldığı misraları yada saldı:

Mən belə gözləmirdim, 
Gözlərimə tül çökür, 
Əllərim əldən düşür. 
Mən də bir təbiətəm, 
Təbiətdə qayda var –
Yay çox isti keçəndə
Payız qəfildən düşür.

Nəriman dayı əlavə etdi: 

– Bu il yay çox isti keçib. Demək, payız qəfildən gələcək, yenə yağışlar yağacaq, arx­lar su ilə dolacaq, çaylar aşıb-daşacaq. Su isə aydınlıqdır, gələn ilin məhsulunun təməlidir. 

Həmişə aydınlıqda, qonaq-qaralı ola­san, Qəbələ! 

İlqar HƏSƏNOV, 
XQ-nin bölgə müxbiri 
Qəbələ