Son illər adı respublikamızın qabaqcıl təhsil ocaqlarının sırasında çəkilən, professor, şəhid atası Kamran Kazımovun rəhbərliyi altında fəaliyyət göstərən Astara Pedaqoji Kollecində keçirilən “31Dekabr- Dünya Azərbaycanlılarının Həmrəyliyi Günü” və Yeni il bayramına həsr olunmuş tədbir könüllərə xoş ovqat, gözəl əhval-ruhiyyə gətirdi.
Astara Pedaqoji Kollecinin kollektivi ilə yanaşı Yeni Azərbaycan Partiyası Astara rayon təşkilatı sədri Həbib Cəfərovun, Astara Təhsil Sektorunun müdiri Xədicə Əliyevanın qatıldığı tədbirdə Ali Baş Komandan cənab İlham Əliyevin rəhbərliyi altında qazanılmış, hər bir Azərbaycanlının sevinc və qürur hissinə çevrilmiş qələbədə canlarından keçməklə xalqımızın azadlığı uğrunda qəhrəmanlıq dastanı yazan bütün Vətən şəhidlərinin əziz xatirəsi ehtiramla anıldı.
Kollecin direktoru, professor K. Kazımov tədbir iştirakçılarını salamlayaraq “31 dekabr - Dünya Azərbaycanlılarının Həmrəyliyi Günü” və Yeni il bayramı münasibətilə təbrik etdi, Qalib xalqımıza hər zaman birlik və həmrəylik arzuladı.
Digər çıxış edən natiqlər Dünya Azərbaycanlılarının Həmrəyliyi Gününün milli birlik ideyasının möhkəmləndirilməsi baxımından xüsusi əhəmiyyət daşıdığını bildirdilər, bu bayramın dünyanın müxtəlif ölkələrində yaşayan soydaşlarımız arasında mənəvi əlaqələrin güclənməsi üçün mühüm töhfə olduğunu dedilər.
Xüsusi olaraq o da diqqətə çatdırılıdı ki, Müstəqil Azərbaycanın qurucusu Ulu Öndər Heydər Əliyevin siyasi xəttinin əsas istiqamətlərindən biri dünya azərbaycanlılarının birlik və həmrəyliyini möhkəmləndirmək idi. Məhz bu uzaqgörən siyasətin nəticəsi olaraq dünyanın 70-dən çox ölkəsində yaşayan soydaşlarımız Dünya Azərbaycanlılarının Həmrəyliyi Gününü böyük sevinc və qürur hissi ilə qeyd edirlər. Bayram milli dəyərlərə sədaqətin, tarixi yaddaşın və ortaq məqsədlər ətrafında birləşməyin təzahürü kimi indi hər bir azərbaycanlının ürəyində özünə yer edib.
Zəfər ORUCOĞLU
Azərbaycan Jurnalistlər Birliyinin üzvü
