Məktəbəqədər və Ümumi Təhsil üzrə Dövlət Agentliyi (MÜTDA) və Azərbaycan Dövlət Pedaqoji Universitetinin Strateji İnkişaf Mərkəzinin (ADPU SİM) birgə təşkilatçılığı ilə həyata keçirilən “Məktəbəqədər təhsildə liderlik” proqramının II çağırışı üzrə qeydiyyat prosesi başa çatıb.

Proqramın 19-28 iyun tarixlərində davam edən qeydiyyat prosesinə paytaxt da daxil olmaqla müxtəlif regionlardan 700-dən çox şəxs müraciət edib.

Xatırladaq ki, proqrama seçim prosesi elektron sənəd qəbulu və müsahibə mərhələlərindən ibarətdir. Elektron sənəd qəbulu üçün namizədlərdən pedaqoji sahədə ali təhsil, dövlət məktəbəqədər təhsil müəssisələrində ən azı 3 illik iş təcrübəsi tələb olunur. 

Proqramda məktəbəqədər təhsil müəssisələrində təlim-tərbiyə prosesinin təşkili və idarə olunması, sənədlərlə işin təşkili, liderlik səriştələrinin artırılması prioritet istiqamətlər olaraq nəzərdə tutulub.

Proqramda iştirak hüququ qazanmış namizədlərə müvafiq məlumat 29-31avqust 2025-ci il tarixlərində  elektron poçt vasitəsilə göndəriləcəkdir.