İqtisadiyyat nazirinin birinci müavini Elnur Əliyevin rəhbərlik etdiyi nü­mayəndə heyəti Latın Amerikasında səfərdə olub. Onlar Braziliyada bir sıra tədbirlərdə iştirak edib, əməkdaşlığın inkişafına dair müzakirələr aparıblar.

Braziliyanın vitse-prezidenti, inki­şaf, sənaye, ticarət və xidmətlər naziri Jeraldo Alkminin Elnur Əliyevlə görü­şü zamanı Azərbaycanın Braziliya ilə əməkdaşlığın möhkəmləndirilməsinə önəm verdiyi vurğulanıb. Ölkəmizdə həyata keçirilən islahatlar barədə məlu­mat verilib. Qeyd edilib ki, Braziliya ilə iqtisadi–ticarət əlaqələri uğurla inkişaf edir. 2025-ci ilin yanvar-iyul aylarında bu ölkə ilə ticarət dövriyyəsi 230 milyon ABŞ dollarından çox olub. Bu isə ötən ilin eyni dövrü ilə müqayisədə iki dəfə yüksəkdir. Braziliya ilə ticarət dövriy­yəsinin artırılması üçün geniş imkanlar olduğu diqqətə çatdırılıb. Tərəflər qarşı­lıqlı iqtisadi münasibətlərin gündəliyin­də olan məsələləri müzakirə ediblər.

Səfər çərçivəsində Azərbaycan Res­publikası Hökuməti və Braziliya Fede­rativ Respublikası Hökuməti arasında ticarət və investisiya əməkdaşlığı üzrə birgə işçi qrupunun 1-ci iclası keçirilib. İqtisadiyyat nazirinin birinci müavi­ni, işçi qrupunun həmsədri Elnur Əli­yev tədbirdə ticarət, investisiya, kənd təsərrüfatı, nəqliyyat və digər sahələrdə Braziliya ilə əməkdaşlığın və təcrübə mübadiləsinin əhəmiyyətini vurğulayıb. Qeyd edilib ki, bu baxımdan birgə işçi qrupu mühüm platforma rolunu oynaya­caq. İclasda Azərbaycanın əlverişli iş­güzar mühiti, investorlar üçün müxtəlif güzəştlər və münbit şərait təqdim edən geniş sənaye və aqroparklar şəbəkəsi haqqında məlumat verilib, braziliyalı sərmayədarlar fəal əməkdaşlığa dəvət edilib.

İclasda çıxış edən Braziliyanın xari­ci işlər nazirinin müavini, birgə işçi qru­punun həmsədri Laudemar Qonçalves de Aguiar Neto Azərbaycanla müxtəlif iqtisadi məsələlər üzrə tərəfdaşlığın gücləndirilməsi istiqamətləri barədə fi­kirlərini bölüşüb.

Toplantıda Azərbaycanın Xarici İş­lər, Rəqəmsal İnkişaf və Nəqliyyat, Elm və Təhsil nazirlikləri, Qida Təhlükəsiz­liyi Agentliyi, Aqrar Tədqiqatlar Mərkə­zi, eləcə də İxracın və İnvestisiyaların Təşviqi Agentliyi – AZPROMO-nun səlahiyyətli nümayəndələri tərəfindən müvafiq sahələrdə işbirliyinin genişlən­dirilməsinə dair müzakirələr aparılıb, təkliflər səsləndirilib. Görüşün yeku­nuna dair imzalanan protokolda ticarət və investisiya, nəqliyyat və logistika, enerji, kənd təsərrüfatı, qida təhlükə­sizliyi, innovasiya, texnologiya, elm və təhsil və turizm sahələrində əməkdaşlıq məsələləri öz əksini tapır. 

XQ