Mirvarid Dilbazi Poeziya Məclisinin təşəbbüsü və Xətai Rayon İcra Hakimiyyətinin dəstəyi ilə 20 sentyabr 2025-ci ildə “II Kəlağayı Festivalı” təşkil olunacaq. Tədbir Xətai rayonu, Heydər Əliyev parkında yerləşən 925 tamaşaçı yerlik amfiteatrda baş tutacaq.
Festival çərçivəsində saat 17:00-dan 18:00-a qədər sərgi ilə tanışlıq olacaq. Saat 18:00-da rəsmi açılış mərasimi keçiriləcək, daha sonra möhtəşəm konsert proqramı təqdim ediləcək. Konsertdə dövlət qurumlarının nümayəndələri, KİV təmsilçiləri, tanınmış müğənnilər, aşıqlar və şairlər iştirak edəcəklər.
Sərgidə Güllü Eldar Tomarlının yaratdığı “Kəlağayı Ev Muzeyi”nin əsrlərə söykənən 200 qədim kəlağayısı, dekorativ-tətbiqi sənət nümunələri, muzeyin digər zəngin eksponatları, həmçinin kəlağayı haqqında nəşr olunmuş kitablar nümayiş etdiriləcək. Bununla yanaşı, Şəki və Basqal ustalarının hazırladığı kəlağayıların nümayişi və satışı da təşkil olunacaq.
Xatırladaq ki, kəlağayı 2014-cü ildə Azərbaycan Respublikasının Birinci vitse-prezidenti, Heydər Əliyev Fondunun prezidenti Mehriban Əliyevanın təşəbbüsü ilə UNESCO-nun Qeyri-Maddi Mədəni İrs üzrə Reprezentativ Siyahısına daxil edilmiş və beynəlxalq səviyyədə tanıdılmışdır. Bu əlamətdar hadisənin 10 illik yubileyi münasibətilə 2024-cü ildə keçirilmiş “I Kəlağayı Festivalı” Xətai rayonunda başlanmış, sonradan Suraxanı, Yasamal, Naxçıvan Muxtar Respublikası və Sankt-Peterburqda davam etdirilmiş, həmçinin respublikamızın ali və orta təhsil müəssisələrində də böyük maraqla qarşılanmışdır.
Ənənənin davamı olaraq, hər kəs 20 sentyabr 2025-ci ildə keçiriləcək “II Kəlağayı Festivalı”na dəvətlidir. Tədbirə giriş sərbəstdir.
