Bu dəfə ümidlər İnteqrasiya Təlimli İnternat Tipli Gimnaziyanın həyətində nəfəs aldı. Gəncə Şəhər İcra Hakimiyyətinin başçısı Niyazi Bayramovun iştirakı ilə keçirilən görüş bir daha sübut etdi: xalqla təmasda olmaq, onların səsinə səs vermək sadəcə rəsmi prosedur deyil – bu, məsuliyyət, diqqət və etimadın cavabıdır.

Görüşdə Gəncə Şəhər İcra Hakimiyyəti başçısı Aparatının məsul əməkdaşları, bələdiyyə sədrləri, idarə, müəssisə və təşkilat rəhbərləri iştirak edirdilər. Bu, birbaşa dialoq platforması idi – insanların birbaşa sözünü, dərdini, arzusunu eşitmək, qayğıya çevrilmiş ümidlərin ünvanına çevrilmək üçün.

Sakinlərin müraciətləri əsasən işlə təminat, maddi yardım və digər sosial məsələlərlə bağlı oldu. Hər bir müraciət özündə bir ailənin yükünü, bir insanın gözləntisini, bir cəmiyyətin sosial nəbzini daşıyırdı. Və bu müraciətlərin hər biri diqqətlə dinlənildi.

Niyazi Bayramov səsləndirilən məsələlərin qısa zamanda qanunauyğun şəkildə həlli üçün müvafiq qurumlara konkret tapşırıqlar verdi. Elə yerindəcə verilən göstərişlər, qeydə alınan problemlər, araşdırılması üçün sənədləşdirilən müraciətlər – bütün bunlar şəhər rəhbərliyinin vətəndaşla həmrəylik ruhuna nə qədər önəm verdiyinin göstəricisi idi.

Bu cür qəbul və görüşlər, əslində, sadəcə idarəçilik aləti deyil, xalqla nəfəs almağın, onların dərdinə şərik olmağın canlı nümunəsidir. Hər bir vətəndaş özü ilə gətirdiyi məktubu, ürəyində gəzdirdiyi sualı, aylarla cavab gözləyən bir problemi səsləndirə bildi. Ən əsası isə – dinlənildilər. Bu, bəlkə də vətəndaş üçün ilk və ən vacib mərhələdir: dinlənilmək və anlaşılmaq.

Vətəndaşlar da bu diqqətə və şəffaf münasibətə laqeyd qalmadılar. Onlar ölkə başçısı cənab İlham Əliyevə və Birinci vitse-prezident Mehriban xanım Əliyevaya göstərilən qayğıya görə dərin minnətdarlıqlarını ifadə etdilər. Çünki hər bir belə görüşün arxasında böyük bir dövlət siyasəti – insanı yaşat ki, dövlət yaşasın fəlsəfəsi dayanır.

Görüşün sonunda Niyazi Bayramov sakinlərlə xatirə şəkli çəkdirdi. Amma bu təkcə şəkil deyildi – bu, yaddaşlara həkk olunan bir an, qarşılıqlı etimadın, yaxınlığın və dövlət-vətəndaş münasibətlərindəki etibar körpüsünün rəmzi idi.

Hamlet Qasımov
XQ-nin bölgə müxbiri
Gəncə