Onsuz da şəhidlərimizin uyuduğu torpaq cənnətdir. Çünki bu torpaq onların qanı ilə suvarılıb, canı ilə qorunub. Amma bu günlərdə Göygöl Rayon İcra Hakimiyyəti həmin cənnəti bir daha işıqlandırıb, şəhidlərimizin ruhunu şad edib.

Zəfər Günü ərafəsində rayonun Şəhidlər xiyabanı tamamilə yeni görkəm alıb. Əvvəllər burada gecələr qaranlıq olurdu, indi isə hər tərəf nur içindədir. İşıqlandırma sistemi quraşdırılıb, ziyarət üçün oturacaqlar düzülüb, yaşıl xiyabanlar salınıb, bardürlər səliqə ilə yenilənib. Bu dəyişikliklər xiyabana təkcə xüsusi gözəllik yox, həm də dərin bir mənəvi abu-hava verib.

Göygöl Rayon İcra Hakimiyyətinin şöbə müdiri Ariz Eyvazov söhbət zamanı bunları dedi:

- Şəhidlərimizin uyuduğu bu məkan  müqəddəs bir ünvandır. Onların ruhu daim bizimlədir. Çalışırıq ki, bu torpaq hər zaman bax, beləcə nurla, ehtiramla yaşasın. Qoy gələcək nəsillər buraya gələndə bilsinlər ki, bu torpaq uğrunda kimlər canlarından keçiblər və onlara bu xalqın ehtiramı necə olub... 

İndi Göygölün Şəhidlər xiyabanı həm bir ziyarətgah, həm də Vətən sevgisinin, qəhrəmanlığın simvoluna çevrilib.

Hamlet Qasımov
XQ-nin bölgə müxbiri
Göygöl rayonu