Dünən Naxçıvanın Heydər Əli­yev Sarayında muxtar Respub­likanın ümumtəhsil məktəbləri üzrə ali təhsil müəssisələrinə qəbul imtahanında yüksək bal toplamış tələbələrlə görüş keçirilib. 

Azərbaycan Respublikası Preziden­tinin Naxçıvan Muxtar Respublikasında səlahiyyətli nümayəndəsi Fuad Nəcəfli bilik yarışında böyük nailiyyətlər qazanan gəncləri səmimi-qəlbdən salamlayıb, ali təhsil müəssisələrinə qəbul imtahanların­da yüksək nəticə göstərən, eləcə də tələbə adını qazanan bütün məzunları, onların valideynlərini təbrik edib, müəllimlərinə təşəkkürünü bildirib. 

Səlahiyyətli nümayəndə qeyd edib ki, ötən tədris ilində muxtar respublikada 4 min 752 şagird ümumi orta, 3 min 992 şa­gird tam orta təhsili uğurla başa vurub. 4 şagird qızıl nişana, 281 şagird isə fərqlən­mə attestatına layiq görülüb. Ali təhsil müəssisələrinə tələbə qəbulu müsabiqəsin­də 396 məzun 500–700, o cümlədən 291 nəfər 500–600, 77 məzun 600–650, 28 şagird isə 650–700 intervalında bal topla­yıb. Ötən illə müqayisədə yüksək nəticə göstərən məzunların sayı 16 faiz artıb. Bu da muxtar respublikada son 30 ildə əldə olunan ən yüksək göstəricidir.

Naxçıvan Muxtar Respublikasının təh­sil naziri Elxan Nəcəfov 2025-ci ilin Nax­çıvan təhsili üçün ən uğurlu illərdən biri olduğunu vurğulayıb. Nazir bu il ilk məzun buraxılışı olan Naxçıvan Dövlət Universi­tetinin gimnaziyasını uğurlu nəticə müna­sibətilə təbrik edərək deyib ki, gimnaziyanı 36 məzun bitirib. Onlardan 16-sı 500-700 intervalında bal toplayıb. Naxçıvan şəhər 17 nömrəli tam orta məktəbin şagirdi Nər­min Əliyeva ABŞ və digər ölkələrin univer­sitetlərinə qəbul üçün keçirilən beynəlxalq SAT imtahanı üzrə 1600 ballıq sistemdən 1580 bal nəticə göstərərək ölkə birinciliyi və dünya üzrə ən yüksək nəticə göstərən 1 faizlik tələbə siyahısına daxil olub. 

Naxçıvan şəhər 1 nömrəli tam orta mək­təbin məzunu Oruc Rəhimlinin anası Səfurə Hüseynova övladlarının əldə etdiyi nailiy­yətlərin ölkə başçısının təhsilə göstərdiyi diqqət və gənclərimizə yaratdığı imkanların bariz nəticəsi olduğunu deyib, ölkə başçısı­na bütün valideynlər adından minnətdarlığı­nı bildirib.

Ali məktəblərə keçirilən qəbul imta­hanlarında 690 bal toplayaraq muxtar res­publika birincisi olan Naxçıvan Qızlar Li­seyinin məzunu Sehrin Cəfərova əmin edib ki, ölkəmizin inkişafına töhfə verən savad­lı, bacarıqlı, əzmkar və vətənpərvər gənclik nümunəsi olacaqlar. 

Tədbirdə 500-700 intervalında nəticə əldə etmiş məzunlar mükafatlandırılıb.

Səbuhi HƏSƏNOV