Doğrudan da, haylarla danışma­ğın özgə yolu qalmayıb. Bunu Azərbaycanın Qarabağ iqtisadi rayonunda müvəqqəti yerləşdiril­miş rus sülhməramlıların məsuliy­yət zonasında ömürlərini uzatma­ğa çalışan separatçı-terrorçuların başçısı Arayik Arutyunyan deyir: “Bakı yalnız inteqrasiya proses­ləri ilə bağlı danışıqlar aparmağa razıdır”. 

Bəli, qondarma rejimin qondarma prezidenti etiraf edib ki, danışıqların başqa formada aparılması mümkünsüz­dür: “İki il cəhd etdim, amma Bakı yalnız inteqrasiya prosesini müzakirə edəcəyini deyir. Onlar bunu təkcə bizə yox, BMT-də də deyirlər. Dünən də, bu gün də - Va­şinqtonda Blinken-Mirzoyan-Bayramov görüşündə də deyilib. Azərbaycan bizə deyir ki, birinci məsələ “müdafiə ordusu­nun” buraxılmasıdır. Ondan sonra “döv­lət idarəetmə sistemi” ləğv edilməlidir. Başqa formada danışıqlar nəticə vermir”.

Bəs sən nə gözləyirdin, ay məğlub ordunun “oyundankənar” separatçı-ko­mandiri? Gözləyirdin ki, Bakı gəlib sənin qondarma qurumunun başçısı kimi ta­cqoyma mərasimində iştirak edəcək? 

* * * 

Arutyunlanın züy tutanlarından biri – erməni separatçı ünsürlərin “vahid vətən partiyasının” rəhbəri Samvel Babayan “Bakı ilə dialoqa” çağırış edib. Özünü, guya, danışıq tərəfdarı, “güzəştlərə ha­zır”, yerli separatçılardan fərqli mövqedə duran hay kimi təqdim etməyə çalışan Babayanın “dialoq formatı”na diqqət yeti­rin: “Bakı ilə Xankəndi arasında dialoqun başlaması zəruridir. İnam yaratmağa, müxtəlif məsələlərdə razılığa gəlməyə çalışmaq lazımdır ki, insanlar dinc və normal yaşasınlar”.

“Sülh carçısı” Babayan bundan son­ra “ikinci məsələyə” – qalan problemlərin müzakirəsinə keçəcəklərindən danışıb: “Bu yolla getməsək, qarşılıqlı etimad ol­masa, heç nəyə nail ola bilmərik. İkinci “siyasi qüvvə” kimi təcili danışıqların əleyhinə deyiləm. Amma ilk növbədə bir-birimizə qarşılıqlı etimadın aşılanma­sı üçün dialoq aparacağımız məqamlar­la bağlı konkret sənəd formalaşdırmalı, sonra başqa məsələlərə keçməliyik”.

Keçmiş “hərbi diplomatın” təxəyyü­lünün üfüqləri çox geniş imiş. O, unudur ki, Azərbaycan, hətta, keçmiş DQMV və onun ətrafındakı 7 rayon işğal altında olanda belə özü kimi separatçıları heç vaxt “tərəf” kimi tanımayıb. Bakı öz sözü­nü birbaşa İrəvana deyib. Bu, hələ o vaxt idi. İndi isə Azərbaycan 44 günlük Vətən müharibəsində böyük hərbi zəfər qaza­nandan, üstəlik, rəsmi İrəvanın Azərbay­canın Qarabağ və anklavlar da daxil ol­maqla, ərazi bütövlüyünü tanımasından sonra özünü “tərəf” sayan Xankəndi ilə hansı formatda danışıqlar aparmalıdır? Bunun elementar məntiqlə qeyri-müm­kün olduğunu həmin separatçı tör-tökün­tüsü doğrudanmı anlamır? Yox, anlayır, amma özünü anlamaz yerinə qoyur. 

Bəli, Xankəndi və ətrafında yaşayan erməni icması ilə müzakirə mövzusu yalnız Azərbaycana inteqrasiya ola bilər. Bakının tək tələbi budur və bunu separat­çıbaşı Arayik Arutyunyan da yaxşı bilir və hətta etiraf edir.

* * * 

“Qarabağda yaranmış hazırkı və­ziyyətə görə yalnız bir şəxs məsuliyyət daşıyır. O, ölkəni idarə etmək və ya bey­nəlxalq diplomatiya sahəsində təcrübə­si olmayan, uğursuz danışıqlar aparan şəxsdir. Bu gün Qarabağı təhvil vermək qərarına gələn şəxs üzündən danışıq­lar prosesi yanlış gedir”. Hayastanın baş naziri Nikol Paşinyanın ünvanına bu aşağılayıcı sözlərin müəllifi kriminal biznesmen, Kremlin uğursuz emissarı statusunu qazanmış Ruben Vardanyan­dır. 

Azərbaycanın sərvətlərini talan et­məklə qazandığı haram milyardları hesa­bına “Arsaxa xoşbəxt gələcək” quracağı­nı vəd edən bu saxtakar tacirin biznesinə son qoyulan kimi oturdulduğu “dovlət na­ziri” postundan da qovuldu. Qarabağdan Rusiya sülhməramlılarının yük maşının­dakı çirkli mələfələrin altında gizlənərək çıxmağı bacaran “xalq qəhrəmanı” indi də silaha sarılıb “müharibə aparmaq­dan” dəm vurur. Amma bir şeyi unudur ki, onun haqqında Bakıda cinayət işi qaldı­rılıb və “günəşli” Qobustan həbsxanası özünün “milyarder” məhkumunun yolunu intizarla gözləyir... 

İ.HƏSƏNQALA, “Xalq qəzeti”