Sentyabrın 3-də Təh­silin İnkişafı Fondu və İş adamları Cəmiyyətinin Milli Assosiasiyasının (İCMA) birgə keçirdi­yi görüşdə dövlət-özəl əməkdaşlığının genişlən­dirilməsi, eləcə də təhsil və gənclərin inkişafı sahə­sində əməkdaşlıq imkan­ları müzakirə edilib.

Təhsil Nazirliyinin mət­buat xidmətindən XQ-yə bil­dirilib ki, Azərbaycan Texniki Universitetinin nəzdində yer­ləşən Davamlı İnkişaf Mərkə­zində təşkil edilən müzakirə­də İCMA-ya üzv və “Marsol Group”a daxil olan şirkətlərin nümayəndələri də iştirak edib­lər.

Məclisi açıq elan edən Təhsilin İnkişafı Fondu İdarə Heyətinin sədri Elnur Nəsi­bov fondun sahibkarlıq su­byektləri ilə əməkdaşlığının təhsil sektoruna gətirəcəyi faydalardan, dövlət–özəl tərəfdaşlığının əhəmiyyətin­dən söz açıb. O, yeni imkan­ların yaradılmasına və təhsilin əmək bazarının tələblərinə uyğun inkişafına xidmət et­məsinə diqqət çəkib. 

Azərbaycan Texniki Uni­versitetinin rektoru Vilayət Və­liyev ali məktəblərlə özəl sek­tor arasında qurulan əlaqələrin təhsil prosesinin keyfiyyətinin artırılmasındakı müsbət rolun­dan danışıb. 

İCMA-nın İdarə Heyətinin sədri və “Marsol Group”un tə­sisçisi Tural Mustafayev özəl sektorun təhsilə dəstəyinin əhəmiyyətini qeyd edib. 

Görüş çərçivəsində fondun ümumi fəaliyyət istiqamətlə­ri, xüsusilə TələbəPlus kartı və Qarabağ Təqaüd Proqramı barədə təqdimatlar keçirilib. 

Sonda Təhsilin İnkişa­fı Fondu ilə İCMA arasında Əməkdaşlıq Memorandumu imzalanıb. İştirakçılar üçün İT təhsil layihəsi olan “Peerstack Academy”, eləcə də Kitabxana İnformasiya Mərkəzinə infotur təşkil olunub. 

Ləman TƏHMƏZ
XQ