Şənbə günü "Axios" nəşrinin öz mənbələrinə istinadən yaydığı məlumata görə, süni intellekt çipləri istehsalçısı "Nvidia" və "Microsoft" gələn həftə əsas prosessor kimi "Nvidia" çiplərindən istifadə edən ilk "Windows" fərdi kompüterlərini (PC) təqdim etməyə hazırlaşırlar.

"Nvidia" çipləri ilə təchiz olunmuş kompüterlərin həm "Microsoft"un "Surface" brendi, həm də "Dell" daxil olmaqla digər kompüter istehsalçıları tərəfindən təqdim ediləcəyi gözlənilir.

"Microsoft"un daha qənaətcil batareya ömrü təmin edən çiplərə keçid cəhdləri hələ ki, satışlarda kəskin bir artıma səbəb olmayıb. Şirkətin əsas rəqibi olan və öz istehsalı olan çiplərdən istifadə edən "Apple" isə cari ilin mart ayında ən son "M5" seriyalı çiplərlə təchiz olunan yeni "MacBook" modellərini nümayiş etdirib.

Hesabatda qeyd olunur ki, "Microsoft" və "Nvidia" yeni fərdi kompüterləri Tayvandakı "Computex" ticarət sərgisində və San-Fransiskoda keçiriləcək "Microsoft Build" tərtibatçılar konfransında təqdim edəcəklər. Hər iki şirkət məsələ ilə bağlı şərh tələbinə cavab verməyib.

Cümə günü "Windows", "Nvidia" və çip dizaynı şirkəti "Arm"ın rəsmi "X" hesablarında Tayvanın paytaxtı Taybeyin koordinatları olduğu təxmin edilən rəqəmlərlə yanaşı, "Kompüterlərin yeni erası" başlığı altında tezliklə reallaşacaq bəyanatın anonsu paylaşılıb.

"Reuters" hələ 2023-cü ildə "Nvidia"nın "Arm" texnologiyasından istifadə edərək "Microsoft"un "Windows" əməliyyat sistemi üçün mərkəzi prosessorlar (CPU) layihələndirmək planları barədə ilk məlumatı yaymışdı.

Hazırda "Qualcomm" şirkəti "Windows" noutbukları üçün "Arm" əsaslı prosessorlar istehsal edir; "Intel" və "AMD" isə bu bazarın dominant prosessor tədarükçüləri olaraq qalmaqdadır.

"Axios"un hesabatına görə, "Microsoft"un, həmçinin süni intellekt agentlərinə tapşırıqları birbaşa "Windows" kompüterlərinin özündə (lokal olaraq) icra etməyə imkan verən yeni proqram təminatını da debüt edəcəyi gözlənilir.

Hazırladı:

Səbuhi MƏMMƏDOV

XQ