Samuxun səxavətli torpaqları bu gün bir daha sübut edir ki, zəhmət olan yerdə bərəkət də əskik olmur. Min illərin kənd təsərrüfatı ənənəsini özündə yaşadan bu diyar, artıq yeni dövrün çağırışlarına cavab verən müasir təsərrüfat nümunələri ilə Azərbaycanın aqrar xəritəsində öz sözünü deyir.

Son illərdə kənd təsərrüfatının müxtəlif sahələrində olduğu kimi, Samuxda da meyvəçilik yüksəliş mərhələsinə qədəm qoyub. Ənənəvi bağçılıqdan fərqli olaraq, indi bu torpaqlarda intensiv üsulla becərilən, tez bar verən və yüksək məhsuldarlıqla seçilən meyvə bağları salınır. Bu, həm məhsuldarlığın artırılmasına, həm də kənd təsərrüfatının modernləşməsinə xidmət edir.

Samux Rayon Statistika İdarəsinin məlumatına görə, 1 avqust 2025-ci il tarixinə rayon üzrə meyvə bağlarının ümumi sahəsi 2 min 372,7 hektara çatıb. Bu sahələrin 234,5 hektarı, yəni 9,8 faizi, artıq intensiv üsulla becərilən müasir bağlardır. Daha da sevindirici hal odur ki, bu bağların 57 hektarı cari ildə yeni salınıb. Ötən ilin eyni dövrü ilə müqayisədə intensiv meyvə bağlarının sahəsində 25 hektar və ya 11,9 faiz artım qeydə alınıb.

Bu, sadəcə, statistik artım deyil – bu, torpağa vurulan dəyərin, zəhmətin və gələcəyə olan ümidin göstəricisidir. Bu gün Samuxun bağlarında yalnız ağaclar deyil, həm də kəndlinin ümidi, gələcəyin rifahı bar verir.

Samuxda intensiv bağçılığın çeşidliliyi də diqqətəlayiqdir. Bu gün rayon ərazisində 10 hektar alma, 10 hektar armud, 14,3 hektar xurma, 7 hektar heyva, 41 hektar ərik, 118,3 hektar şaftalı, 6,3 hektar gavalı, 2 hektar alça və 25,6 hektar gilas bağları intensiv üsulla becərilir. Hər biri öz fəsli ilə Samuxun süfrəsini bəzəyir, bazarlarını canlandırır.

Bu bağlardan artıq 1319,6 ton məhsul yığılıb və məhsul yığımı hələ də davam edir. Bu isə o deməkdir ki, hər il daha çox ailənin ruzisi bu bağlardan gələcək, kəndlinin əli işdən, süfrəsi nemətdən kəsilməyəcək.

İntensiv bağçılığın genişlənməsi həm də yeni iş yerlərinin yaradılması, aqro-turizm potensialının inkişafı və yerli sahibkarların stimullaşdırılması baxımından mühüm əhəmiyyət daşıyır. Samux artıq yalnız kənd təsərrüfatı ilə deyil, həm də müasir texnologiyalarla inteqrasiya olunmuş aqrar model ilə tanınmağa başlayır.

Bu gün Samuxun bağları çiçəkləyirsə, sabah bu çiçəklər meyvəyə, o meyvələrsə gəlirə və rifaha çevriləcək. Bu torpaq bunu bacarır, çünki bu torpağın sahibləri zəhmətkeşdir, inamlıdır, gələcəyə bağlıdır.

Hamlet QASIMOV,
XQ-nin bölgə müxbiri
Samux