Dövlət Statistika Komitəsindən aldığımız məlumata görə, bu ilin I yarısında Qarabağ və Şərqi Zəngəzur iqtisadi rayonlarında 1600 (ötən ilin eyni dövründəki göstərici ilə müqayisədə 615 və ya 62,4 faiz çox) yeni iş yeri açılıb. Hesabat dövründə Qarabağda 1040 (87,7 faiz çox), Şərqi Zəngəzurda isə 561 (29,9 faiz çox) yeni iş yerləri yaradılıb. Bu dövrdə Qarabağ iqtisadi rayonu üzrə yeni yaradılan ən çox iş yeri Xankəndidə (385) və Şərqi Zəngəzurda isə Laçın rayonunda (244) olub.
Ümumilikdə, 2025-ci ilin 6 ayı ərzində Azərbaycanda 48,9 min yeni iş yerləri açılıb. Bu dövrdə iş yerlərinin 92,1 faizi qeyri–dövlət sektorunda fəaliyyətə başlayıb. Yeni açılmış iş yerlərinin 74,7 faizi Bakı şəhərinin, 1,1 faizi Naxçıvan Muxtar Respublikasının, 24,2 faizi digər regionların payına düşüb.
Ölkədə iş yerlərinin açılmasında qeyri–neft sektorunun fəaliyyəti səmərəliliyi ilə daha çox diqqət çəkir. Bu önəmli istiqamət Azərbaycanın 2030-cu ilədək Milli Prioritetlərində və 2022–2026-cı illər üzrə sosial-iqtisadi inkişaf Strategiyasında da aydın nəzərə çarpır. Sənəddə qarşıya qoyulan prinsiplərə əsaslanılmaqla gələcəkdə bu sektorda daha yüksək göstəricilər əldə etmək, bununla da dünya iqtisadiyyatında respublikamızın mövqeyini gücləndirmək hədəflənir.
Qeyd edək ki, bu gün iqtisadi diversifikasiyada qeyri–neft sənayesinin innovativ üsullarla inkişafı və şaxələndirilməsi önəmli rol oynayır. İdxalı əvəz edən, yeni ixrac imkanları yaradan, eləcə də müasir texnologiyalara əsaslanan rəqabətqabiliyyətli istehsal və emal müəssisələrinin fəaliyyətə başlaması, başqa sözlə, iş yerlərinin açılması isə mövcud sahənin yeni mərhələyə daxil olmasını şərtləndirir.
