Dekabrın 21-də Müasir İncəsənət Mərkəzi qalereyasında “Qış nağılı” rəsm sərgisi keçirilmiçdir. 5 yaşdan 18 yaşa qədər uşaq və yeniyetmə, gənc rəssamlar “Qış nağılı” adlı rəsm sərgisində iştirak ediblər. Sərgi iştirakçılarının çəkdikləri rəsm əsərləri mövzu baxımından rəngarəngliyi ilə diqqəti cəlb etmiş, qonaqlara, tamaşaçılara xoş təsirli anlar bəxş etmişdir. Rəsm sərgisinin təşkilatçıları ilə söhbətləşdik,ürək sözlərini dinlədik:
- Şəms Səttarzadə, rəssam, “Sattar Art” studiyasının və “Sattar Art” qalereyasının rəhbəri. Bu gün 18 yaşa qədər gənc rəssamların əsərlərinin “Qış nağılı” mövzusunda sərgisini keçirdik. Fəsillərin hər birinin öz gözəlliyi, füsunkarlığı var. Qış fəslinin özünəməxsus ecazkarlığı, əsrarəngiz təbiəti 18 yaşa qədər yeniyetmə rəssamların əsərlərində nümayiş olundu. Uşaqların üzündəki təbəssüm sanki qış fəslinin füsunkarlığı ilə vəhdət təşkil edirdi. Şaxta Babanın gəlişi uşaqları xüsusi olaraq sevindirirdi. Hələ onun gətirdiyi hədiyyələri demirik. Hamının çöhrəsində yeni ilin sevinci yaşanırdı.
Rəssamlıq incəsənətin elə bir sahəsidir ki, insanın bütün düşüncələri, yaradıcılığı onun yaratdığı rənglər dünyasında öz əksini tapır. Bu mənada hər sərgidə istedadlı uşaqları kəşf edirik. İnanırıq ki, gələcəkdə incəsənətimiz, mədəniyyətimiz yeni-yeni gənc nəsillərin əsərləri ilə dünya miqyasına çıxacaq. Mən də xoşbəxtəm ki, istedadlı uşaqların bacarığının üzə çıxarılmasında əməyimi, qabiliyyətimi əsirgəmirəm. Bu sərginin gözəlliyi onda idi ki, 5 yaşdan 18 yaşına kimi uşaqlar,yeniyetmələr qış fəsli haqqında düşüncələrini rənglərin dili ilə ifadə edə biliblər.
Qəş fəslinin rənglər dünyasına səyahət etdik, 100-ə yaxın yeniyetmə gənc yeni il sərgimizdə iştirak etdi və onlar işlərinə uyğun olaraq qiymətləndirildilər.
- Siz zəhmət olmasa özünüzü təqdim edin.
- Təhminə Qəhrəmanova. Karvan Art” studiyanın rəhbəri.
- Təhminə xanım, bu günki sərginin əhəmiyyəti haqqında nə deyə bilərsiniz?
- Yeni il ərəfəsində bütün yaş qruplarında olan uşaqları sevindirməkdən gözəl nə ola bilər? Hər bir əsər yeni bir fikir, sənətə, rəsm dünyasına fərqli baxışdır. Yeniyetmələri yeni ilin astanasında sevindirmək üçün belə bir sərginin keçirilməsi təqdirəlayiqdir. “Qış nağılı” sərgisinin əhəmiyyəti ondadır ki, uşaqlar öz yaradıcılıqları ilə tək özlərini deyil, valideynlərini, biz müəllimlərini də sevindirdilər. Bunun üçün Şəms xanımla birgə günlərlə işləmişik ki, hər bir uşağın, yeniyetmənin bacarığını, istedadını, qabiliyyətini üzə çıxara bilək. Elə yeniyetmə gənclərin öz əl işlərinə baxıb sevinməsi, gələcək həyat yollarını müəyyənləşdirməsi özü bir xüsusi önəm daşıyır. Uşaqların üzündəki təbəssüm bizim üçün ən böyük mükafatdır. 5 yaşdqan 18 yaşa kimi uşaqların rəsmlər aləminə səyahət etməsi, qış fəslinə aid düşüncələrini sevgi ilə boyalarla ifadə etməsi bizdə belə bir təəssürat yaratdı ki, bu uşaqların gələcəyi parlaqdır.
Zaman gələcək ki, bu yeniyetmələrin içindən Azərbaycanın məşhur rəssamları yetişəcək. Və biz o zaman yetirmələrimizlə fəxr edəcəyik.
Qarşıdan yeni il və Dünya Azərbaycanlılarının Həmrəylik Günü gəlir. Bu münasibətlə valideynləri və “Qış nağılı” sərgisinin iştirakçılarını təbrik edirik. Qoy bizim balaca rəssamlar yer üzündə sülh rəmzi olan əsərlər yaratsınlar, dünyanı əmin- amanlığa səsləsinlər.
Kəmalə Abdinova
XQ
