Gəncə Şəhər Ağsaqqallar Şurasının sədri, professor Nurəddin Məmmədov və Şuranın İdarə Heyətinin üzvləri Türkiyənin Gəncədəki Baş Konsulluğunda olublar. Onlar Baş konsul Recep Öztopla görüş zamanı Azərbaycandan Türkiyəyə yola düşən C-130 tipli hərbi nəqliyyat təyyarəsinin Gürcüstan ərazisində qəzaya uğraması nəticəsində şəhid olan türk hərbçilərinin xatirəsini ehtiramla yad edib, şəhidlərin ailələrinə və qardaş Türkiyə xalqına dərin hüznlə başsağlığı veriblər.

 Görüşdə çıxış edən professor Nurəddin Məmmədov bildirib ki, Ulu Öndər Heydər Əliyev və böyük lider Mustafa Kamal Atatürkün yolunu davam etdirən Azərbaycan və Türkiyə bu gün də “bir millət, iki dövlət” prinsipi ətrafında birləşir:

“Kədəriniz – kədərimiz, sevinciniz – sevincimizdir. Xalqlarımızı tarixin ən ağır sınaqlarından keçmiş sarsılmaz qardaşlıq və dostluq telləri bağlayır. Ortaq dil, din, tarix və mədəniyyətə malik olan Azərbaycan–Türkiyə münasibətləri bu gün də yüksələn xətlə inkişaf edir. Əminik ki, Prezident İlham Əliyev və Prezident Rəcəb Tayyib Ərdoğanın rəhbərliyi ilə bu münasibətlər gələcəkdə daha da möhkəmlənəcək, xalqlarımız daim sülh və rifah içində yaşayacaqlar.”

 Səmimi şəraitdə keçən görüşdə Gəncə Şəhər Ağsaqqallar Şurası ilə Baş Konsulluq arasında əməkdaşlığın mövcud vəziyyəti və gələcək perspektivləri müzakirə olunub.

Baş konsul Recep Öztop Şuranın həyata keçirdiyi əhəmiyyətli fəaliyyətin yüksək qiymətləndirildiyini qeyd edib və iki qardaş ölkə arasında, o cümlədən ağsaqqalları və ziyalıları təmsil edən qurumlar səviyyəsində əlaqələrin daha da gücləndirilməsinin vacibliyini vurğulayıb.

Görüşdə Şuranın qadın üzvləri də iştirak ediblər.

Hamlet Qasımov,

XQ-nin bölgə müxbiri