İyun ayında Rusiyadan Hindistana neft idxalının həcmi yenidən rekord həddə çatıb. Bloomberg-in sitat gətirdiyi Kpler analitik şirkətinin məlumatına görə, Rusiyadan Hindistana gündəlik neft tədarükü son bir ayda gündə 2,2 milyon barrelə yüksəlib. Rekord rəqəmlər ardıcıl 10-cu aydır müəyyən edilir.

Kpler-in xam neft tədarükünün təhlili departamentinin rəhbəri Viktor Katon qeyd edir ki, iyun ayında Hindistanın idxal etdiyi Rusiya neftinin həcmi Səudiyyə Ərəbistanı və İraqın tədarük həcmini bir daha üstələyib. Bununla belə, Kpler-in proqnozlarına görə, Hindistanın Rusiyadan aldığı neftin həcmi infrastruktur problemləri və digər təchizatçılarla yaxşı münasibətlər saxlamaq zərurətinə görə yaxın aylarda son həddinə çata bilər.

Analitik firmanın məlumatına görə, son iki ayda Rusiya neftinin ən böyük alıcısı Hindistanın dövlətə məxsus Indian Oil Corp. və ölkənin ən böyük holdinqi Reliance Industries Ltd.-dir. Analitiklərin fikrincə, iyun ayında Hindistana Rusiyanın Urals neftinin idxalı da gündəlik 1,5 milyon barellə növbəti rekorda çatıb.

May ayında Hindistanın idxal etdiyi Rusiya neftinin payı da rekord həddə - 46%-ə çatıb. Bloomberg tədarükün artımını Rusiya neftinin digər ölkələrdən gələn yanacaqdan daha aşağı qiymətə satılması ilə əlaqələndirib.

Rusiya Federal Gömrük Xidməti Hindistanı Rusiya Federasiyasının xarici ticarətində Avropa İttifaqını əvəz edən ölkələr sırasında qeyd edib. Hindistan da Çinlə birlikdə Rusiyanın kömür, neft və qazının əsas alıcısına çevrilib. Indian Oil bildirib ki, Hindistan 2024-cü ilə qədər Rusiya neftinin idxalının payını 30%-ə çatdıracaq.

"Xalq qəzeti"