Bizi Telegram-da da izləyə bilərsiniz:@xqazeti

İran nümayəndə heyəti İsveçrənin Bürgenştok şəhərində keçirilən danışıqlar zamanı ABŞ Prezidenti Donald Trampın İranla bağlı son bəyanatlarına etirazını Amerika tərəfinin diqqətinə çatdırıb.

Məlumata görə, etirazın səbəbi Trampın İran ərazisinə qarşı yenidən hərbi zərbələr endirilə biləcəyi barədə səsləndirdiyi açıqlamalar olub. İran tərəfi bu cür bəyanatların regionda gərginliyi artırdığını və diplomatik proseslərə mənfi təsir göstərdiyini vurğulayıb.

İranın "Press TV" telekanalının yaydığı məlumata əsasən, Tehrandakı rəsmi dairələr ABŞ prezidentinin hədələri fonunda mümkün cavab addımlarını və müxtəlif reaksiyalar variantlarını nəzərdən keçirirlər. Mənbələr bildirirlər ki, İran rəhbərliyi ölkənin təhlükəsizliyi və milli maraqlarının qorunması istiqamətində bütün ssenariləri qiymətləndirir.

Xatırladaq ki, Donald Tramp daha əvvəl "Truth Social" platformasında paylaşdığı açıqlamada Livandakı vəziyyətə toxunaraq, zərurət yaranacağı təqdirdə ABŞ qüvvələrinin İran ərazisində yeni hərbi əməliyyatlar həyata keçirə biləcəyini istisna etməmişdi.

Müşahidəçilər hesab edirlər ki, tərəflər arasında qarşılıqlı sərt bəyanatlar Yaxın Şərqdə onsuz da mürəkkəb olan təhlükəsizlik vəziyyətini daha da gərginləşdirə bilər. Buna baxmayaraq, diplomatik kanalların açıq saxlanılması və dialoqun davam etdirilməsi istiqamətində səylərin davam etdiyi bildirilir.