AMEA-nın Gəncə Bölməsində Elm və Təhsil Nazirliyinin Nəbatat Bağı (Gəncə) tərəfindən “Müasir iqlim dəyişmələrinin Azərbaycanın Qərb bölgəsinin bitki örtüyünə təsiri” mövzusunda respublika elmi konfransı keçirilib. İki gün davam edən forumda Gəncə, Bakı və Naxçıvandan olan alim və tədqiqatçılar məruzə ilə və ya onlayn şəkildə iştirak ediblər.

Tədbirdən əvvəl ekoloji istiqamətli elmi qurumların fəaliyyətinə həsr olunan sərgiyə baxış keçirilib. Konfrans Dövlət Himninin səsləndirilməsi və şəhidlərin xatirəsinin anılması ilə açıq elan olunub.Konfransın aparıcısı, Nəbatat Bağının Bitki ehtiyatları şöbəsinin müdiri, professor Aynur Bayramova proqramın ölkənin müxtəlif bölgələrində ekoloji problemlərin həlli ilə bağlı aktual məsələləri əhatə etdiyini diqqətə çatdırıb.

AMEA-nın Rəyasət Heyətinin üzvü, Gəncə Bölməsinin sədri, akademik Fuad Əliyev çıxışında Prezident İlham Əliyevin elm və təhsil qarşısında müəyyənləşdirdiyi vəzifələrin milli elmin inkişafında mühüm istiqamət olduğunu bildirib. O, Azərbaycanın iqlim dəyişikliyi ilə mübarizədə beynəlxalq nüfuz qazandığını vurğulayaraq alimləri qlobal ekoloji problemlərin həllinə fəal töhfə verməyə çağırıb.

Gəncə Dövlət Universitetinin Botanika kafedrasının müdiri, AMEA-nın müxbir üzvü Vaqif Novruzov antropogen təsirlərin yaratdığı qlobal ekoloji böhranın artdığını qeyd edib və COP29-un əhəmiyyətini xatırladıb.

Plenar iclasda müxtəlif elmi-tədqiqat müəssisələrini təmsil edən mütəxəssislər biologiya, ekologiya və iqlim dəyişikliyi ilə bağlı aktual məsələlərə dair məruzələrlə çıxış ediblər. Daha sonra konfrans “Bioloji müxtəlifliyin müasir vəziyyəti”, “Faydalı və dərman bitkiləri”, “Nadir növlər və biotexnologiya”, “İqlim dəyişmələrinin floraya təsiri”, “Landşaft dizaynı və yaşıllıqların mühafizəsi” və digər mövzuları əhatə edən yeddi bölmə üzrə işini davam etdirib.

Fəal iştirakçılara sertifikatlar təqdim olunub. Konfransa ümumilikdə 60 məruzə təqdim edilib və materiallar ayrıca kitab şəklində nəşr olunub.

Hamlet Qasımov,

XQ-nin bölgə müxbiri