Amerikanın “Newsweek” jurnalı “Prezident Ərdoğan dünyanın ən güclü adamlarından birinə və Trampın müttəfiqinə çevrildi” başlıqlı məqalə dərc edərək, Türkiyə liderinin beynəlxalq arenada və qlobal diplomatiyada atdığı güclü addımlar sayəsində getdikcə “qlobal lider”ə çevrildiyini təfərrüatı ilə izah edib.

Xarici siyasət və milli təhlükəsizlik üzrə yüksək vəzifəli yazıçı Tom O'Konnor tərəfindən yazılan məqalədə qeyd edilir ki, Donald Tramp ABŞ prezidenti vəzifəsinə gəldiyi gündən qlobal səhnədə fəal şəkildə müttəfiqlər axtarır və Ərdoğan regionun ən nüfuzlu simalarından biri kimi ortaya çıxıb.

Son bir həftə ərzində Ərdoğanın roluna xüsusi diqqət yetirilib: o, atəşkəs və PKK-nın tərksilah edilməsinə çağırışlarda, həmçinin ABŞ-ın Suriyaya qarşı sanksiyalarının ləğvində mühüm rol oynayıb. Bundan başqa, Ərdoğan Trampı Suriya prezidenti Əhməd Şaraa ilə görüşməyə razı sala bilib ki, bu da Türkiyə liderinin artan təsirindən xəbər verir.

Məqalədə həmçinin Türkiyənin qlobal miqyasda mühüm diplomatik rolu, xüsusən də son vaxtlar Rusiya və Ukrayna arasında danışıqlara ev sahibliyi etməsi vurğulanır ki, bu da ölkənin əsas beynəlxalq oyunçu statusunu açıq şəkildə nümayiş etdirir.

Məqalədə Türkiyə prezidentinin müşaviri, səfir və professor Çağrı Erhanın fikirlərinə yer verilib. O qeyd edib ki, prezident Ərdoğan “Dünya beşdən böyükdür” şüarı ilə BMT Təhlükəsizlik Şurasının beş daimi üzvü ətrafında qurulmuş hazırkı strukturdan daha “daha ​​ədalətli” beynəlxalq nizama nail olmaq üçün islahatlara çağırır: “Buna görə də Ərdoğan təkcə regional deyil, həm də qlobal səviyyədə unikal lider səviyyəsinə qalxır. Məncə, cənab Tramp da bunu anlayır”. 

Prezident Ərdoğan 2022-ci ilin yazında Rusiya və Ukrayna nümayəndələri arasında Qara dənizdə taxıl sazişinin bağlanmasına vasitəçilik edərək danışıqlara rəhbərlik edib. Suriyada Bəşər Əsəd rejiminin süqutundan sonra “Tramp Ərdoğanı “çox ağıllı və çox güclü adam” kimi xarakterizə edib.

P.ƏMİRCANOV
XQ