Türkiyənin şimalında yerləşən, yaşıl təbiəti və zəngin mədəniyyəti ilə seçilən Qara dəniz sahilləri “National geographic” jurnalının 2026-cı ilin ən ilhamverici səyahət istiqamətlərini təqdim edən “Dünyanın ən yaxşıları” siyahısına daxil edilib. Bu, həm regionun təbiət gözəlliklərinə, həm də qədim mədəni irsinə verilən böyük bir qiymətdir.
Qara dəniz sahilləri - bu, sadəcə bir coğrafiya deyil, insanı həm düşündürən, həm də rahatladan bir dünyanın qapısıdır. İndi bu qapı bütün dünyaya açılıb. Burada hər şey bir rəng ahəngidir: Rize və Trabzonun yamyaşıl çay plantasiyaları, Giresunun fındıq bağları, Ordu və Samsunun uzanan çimərlikləri, Artvinin qarlı dağ silsilələri - hamısı Qara dəniz sahilinin bir-birini tamamlayan simfoniyasıdır. Dalğalardan axan buz bulaqları və meşələrin yaşıl nəfəsi bu torpağa başqa bir ruh bəxş edir.
Kaçkar Dağları Milli Parkı bu sahillərin tacıdır - buradan baxanda dəniz, sanki dağların ayaqlarına sərilmiş mavi bir xalça kimi görünür. Sumela monastırı, Ayder yaylası, Amasra və Sinop kimi şəhərlər isə Qara dənizin təkcə təbiət deyil, mədəniyyət xəzinəsi olduğunu göstərir. Məhz bu baxımdan da “National Geographic”in “BEST OF THE WORLD” – 2026” siyahısında yer alan Türkiyənin Qara dəniz sahilləri dünya səyyahları üçün yeni kəşf məkanı kimi təqdim olunur.
Hər il “National Geographic”in redaktorları və səyahət mütəxəssisləri tərəfindən hazırlanan bu siyahı gələn ilin ən maraqlı 25 səyahət istiqamətini özündə birləşdirir. Qara dəniz sahillərinin bu siyahıya daxil olması, Türkiyənin yalnız “dəniz, günəş və qum” turizmi ilə deyil, həm də dağları, vadiləri, mədəni irsi və canlı yerli həyatı ilə cəlbedici bir turizm ölkəsi olduğunu bir daha göstərir.
Qara dəniz bölgəsi, adından da göründüyü kimi, Türkiyənin şimal sahili boyunca Qara dənizlə uzanır. Yaşıl Şimal Anadolu dağları ilə əhatə olunan bu bölgə təbiətin və sakitliyin vəhdətini simvollaşdırır. Dumanlı təpələri, sıx meşələri, geniş vadiləri və ənənəvi kənd həyatı ilə Qara dəniz bölgəsi öz təbii gözəlliyini və sakit xarakterini qoruyur.
Son illərdə beynəlxalq səyahət siyahılarında adından daha çox söz etdirən Qara dəniz bölgəsi CNN Travel tərəfindən “2024-cü ildə ziyarət üçün ən yaxşı yerlərdən biri” olaraq təqdim edilib. Ardınca, bölgənin Ordu və Giresun vilayətləri Lonely Planet tərəfindən “Best in Travel 2025” siyahısında yer alıb.
Bu artan beynəlxalq marağın davamı olaraq, “National Geographic” 2026-cı ildə səyahətçilərin mütləq ziyarət etməli olduğu istiqamətlər arasında Qara dəniz sahillərini göstərib. Bu gözəl sahil zolağı hər zövqə uyğun təcrübələr təqdim edir: qumlu çimərliklər, tarixi memarlıq nümunələri, sıx meşələr və özünəməxsus Qara dəniz mətbəxi.
Jurnalın qeyd etdiyi kimi, hələ də kütləvi turizmin diqqətindən kənarda qalan bu şimal bölgə yaxın illərdə Türkiyənin ən çox axtarılan istiqamətlərindən birinə çevrilməyə namizəddir.
Bir zamanlar İpək Yolu üzərində mühüm ticarət mərkəzi olan Türkiyənin Qara dəniz bölgəsi bu gün səyahətçiləri təbiətin möcüzələrini kəşf etməyə dəvət edir. Alp-Himalay geoloji qurşağının bir hissəsi olan Şimal Anadolu dağlarında yerləşən milli parklar, yaşıl mənzərələr içində unudulmaz yürüş marşrutları və ulduzlu səma altında sakit düşərgə gecələri təqdim edir.
Macərasevənlər üçün bölgədə müxtəlif imkanlar mövcuddur: Gümüşhanə yaxınlığındakı Karaca mağarasındakı milyon illik sarkıt və dikitləri kəşf etmək, Fırtına çayında rafting etmək, yaxud Rizedəki Ayder yaylasında zipline ilə adrenalini hiss etmək bu siyahıya daxildir.
“National Geographic”in vurğuladığı kimi, Qara dəniz dünyada eyni gündə həm dənizdə sörf etmək, həm də dağlarda xizəklə sürüşmək imkanı verən nadir yerlərdən biridir. Sakit sahil zolaqlarında istirahət etdikdən sonra, Ordu Çambaşı və Rize Ovit kimi dağ zirvələrində xizək və snoubordla həyəcan dolu anlar yaşamaq mümkündür.
Bölgə həmçinin orta əsr qalaları (məsələn, Rizedəki Zil qalası), memarlıq inciləri (Trabzondakı Sümela monastırı və Ayasofya) və ənənəvi yaşayış məskənləri ilə də diqqət çəkir. UNESCO-nun Dünya İrsi siyahısında yer alan Karabükdəki Safranbolu və Trabzondakı Orta Məhəllə bu zəngin tarixi irsin gözəl nümunələrindəndir.
Qara dəniz sahilləri yalnız təbiəti və mənzərələri ilə deyil, həm də yerli mədəniyyətini və ənənələrini əks etdirən zəngin mətbəxi ilə də fərqlənir. Sahil bölgəsində yerləşdiyinə görə, təzə balıq və dəniz məhsullarından hazırlanan yeməklər, xüsusilə də hamsili plov (hamsi ilə düyü yeməyi) bölgənin ən sevilən ləzzətlərindən biridir.
Bundan əlavə, qarğıdalı unu və pendirdən hazırlanan məşhur səhər yeməyi kuymak, Akçaabat köftəsi, Samsun pidesinin müxtəlif növləri, qaralahana dolması və Hamsiköy sütlacı bölgənin kulinariya xəzinəsini nümayiş etdirir. Bu ləzzətlər Qara dənizə gələn qonaqlara unudulmaz bir dad səyahəti yaşadır. Xüsusilə Rizenin Çeçeva kəndində keçirilən çay yığım turları bölgənin həm kənd həyatını, həm də çay mədəniyyətini yaxından tanımaq üçün nadir və unikal təcrübə hesab olunur.
Beləliklə, Qara dəniz sahilləri, zəngin təbiəti, mədəniyyəti, tarixi və kulinariya zənginlikləri ilə səyahətçiləri özünə cəlb etməyə davam edir və yaxın gələcəkdə turizm sahəsində daha çox diqqət çəkəcək.
Qara dəniz sahilləri təkcə Türkiyənin deyil, bütün bölgənin mədəni və təbii yaddaşıdır.
Burada dənizin gur səsi ilə dağların sükutu arasında insan özünü tapır. Dalğalar bir nağıl kimi sahilə çırpılır və hər dalğa sanki eyni sözləri pıçıldayır:
“Gəlin, bizi kəşf edin”.
Nurəngiz ADİLQIZI
XQ
