Gürcüstanın nüfuzlu “Sakartvelos Respublika” (“Gürcüstan Respublikası”) qəzetində Xocalı soyqırımının 34-cü ildönümünə həsr olunmuş “Xocalı: Bitməyən ağrıdan Zəfər təntənəsinə” sərlövhəli məqalə dərc olunub. Məqalədə gürcü oxuculara məlumat verilir ki, Ermənistanın Azərbaycana təcavüzü nəticəsində baş vermiş Xocalı soyqırımından 34 il keçir. Otuz dörd il əvvəl fevralın 25-dən 26-na keçən gecə Ermənistan silahlı qüvvələri tərəfindən törədilən bu qətliam nəticəsində 613 dinc sakin, o cümlədən 106 qadın, 63 uşaq və 70 qoca amansızlıqla qətlə yetirilib. 8 ailə tamamilə məhv edilib, yüzlərlə insan şikəst qalıb və əsir götürülüb.
Bu gün Xocalını anarkən biz təkcə faciəni xatırlamırıq, həm də Xocalı qurbanlarının qisasının döyüş meydanında alındığını vurğulayırıq. 2023-cü ilin sentyabrında keçirilən antiterror tədbirləri nəticəsində Xocalı şəhəri tamamilə azad edildi və Azərbaycanın dövlət bayrağı orada ucaldıldı.
Məqalə daha sonra aşağıdakı yarımbaşlıqla davam etdirilir:
Prezident İlham Əliyevin rolu və strateji fəaliyyəti
Prezident İlham Əliyevin Azərbaycana rəhbərliyi dövründə Xocalı faciəsinin dünya miqyasında tanıdılması və ədalətin bərpası istiqamətində misilsiz işlər görülmüşdür. Onun bu sahədəki fəaliyyətini bir neçə əsas istiqamətə bölmək olar:
Beynəlxalq səviyyədə tanınma: Dövlət başçısının yürütdüyü aktiv xarici siyasət nəticəsində bir çox ölkələr və beynəlxalq təşkilatlar Xocalı hadisələrini rəsmən soyqırımı kimi tanımışdır. Heydər Əliyev Fondunun dəstəyi ilə həyata keçirilən “Xocalıya ədalət!” kampaniyası bu işdə mühüm rol oynamışdır.
Hərbi strategiya və qisas: İlham Əliyev hər zaman vurğulayırdı ki, Azərbaycan xalqı bu təhqirlə barışmayacaq. 44 günlük Vətən müharibəsi və lokal antiterror tədbirləri ilə o, Müzəffər Ali Baş Komandan kimi Xocalı qatillərindən qisası döyüş meydanında aldı.
Xocalının yenidən qurulması: Bu gün Xocalı şəhəri Prezidentin birbaşa nəzarəti altında yenidən tikilir. 2024-cü ilin fevralında Xocalı şəhərində ucaldılan Xocalı Soyqırımı Memorial Kompleksinin təməlinin qoyulması və şəhərin sakinlərinin öz evlərinə qaytarılması bu tarixi ədalətin ən böyük sübutudur.
Cinayətkarların məsuliyyətə cəlb edilməsi: Xocalı qətliamında iştirak edən separatçı liderlərin və hərbi cinayətkarların Bakıda ədalət mühakiməsi qarşısında cavab verməsi İlham Əliyevin qətiyyətli siyasətinin nəticəsidir.
Nəticə: Bu gün Xocalı artıq əsir şəhər deyil. İlham Əliyevin liderliyi sayəsində Azərbaycan həm hərbi, həm də siyasi-diplomatik müstəvidə qalib gələrək, 34 illik yarasına məlhəm qoymuşdur...
Paşa ƏMİRCANOV
XQ
