Dövlət Turizm Agentliyinin məlumatına görə, Qarabağ və Şərqi Zəngəzurun təbii resursları və mədəni irsi aqroturizmin inkişafı üçün əlverişli şərait yaradır. Lakin bu ərazilərdə bir çox iri fermer təsərüffatları olsa da, ixtisaslaşmış aqroturizm fəaliyyət göstərmir. Buna görə də işğaldan azad edilən bölgələrdə turizmin inkişafı dövlət siyasətinin əsas prioritet istiqamətlərindən biri kimi müəyyənləşdirildiyinə görə, sahənin inkişafının ilkin qiymətləndirilməsi qarşıda önəmli vəzifə kimi durur.
Qeyd edək ki, bu ərazilər özünün zəngin təbii sərvətləri, əlverişli iqlim şəraiti, bol su ehtiyatları, tarixi-mədəni irsi və mənzərəli relyefi ilə ölkə turizminin mühüm inkişaf zonası hesab olunur. Turizm potensialı baxımından seçilən əsas bölgələrdən biri olan Şuşa şəhəri respublikanın mədəniyyət paytaxtı kimi qədim tarixi abidələri, muzeyləri və geniş turizm infrastrukturu ilə fərqlənir. Şəhərdə beynəlxalq səviyyəli festivalların və irimiqyaslı turizm tədbirlərinin keçirilməsi üçün baza rolunu oynaması nəzərdə tutulur.
Kəlbəcərdə qış və sağlamlıq turizminin inkişaf etdirilməsi, Ağdamda “dark” – işğalın nəticələrinin çılpaq şəkildə göstərilməsi, Tuğ və Hadrutda şərab, Azıx, Tağlar mağaraları ilə bağlı marşrutların salınması planlaşdırılır. Laçın meşəlik və dağlıq relyefi sayəsində dağ turizmi üçün əlverişli imkanlara malikdir. Rayonda ekoturizm marşrutlarının və yay istirahət mərkəzlərinin yaradılması planlaşdırılır. Kəlbəcər rayonu isə mineral su ehtiyatları, müalicəvi iqlimi və dağlıq təbiəti ilə sağlamlıq və qış turizminin inkişafı baxımından yüksək potensiala malikdir.
Zəngilanın Araz çayı boyunca uzanan landşaftları və zəngin bioloji müxtəlifliyi ekoturizm və aqroturizmin təşkili üçün əlverişli hesab olunur. Füzuli və Cəbrayıl rayonları da tarixi abidələri, qədim yaşayış məskənləri və su ehtiyatları ilə turizm fəaliyyətinin genişləndirilməsi üçün perspektivli ərazilərdir.
