Naxçıvan ərazisinə qarşı həyata keçirilən dron hücumu regionda təhlükəsizlik balansını pozan və ciddi narahatlıq doğuran hadisə kimi qiymətləndirilməlidir. Xüsusilə mülki infrastruktura qarşı yönəlmiş hücumlar beynəlxalq hüququn norma və prinsiplərinə zidd olmaqla yanaşı, humanitar baxımdan da tamamilə qəbuledilməzdir. Dinc əhalinin istifadə etdiyi obyektlərin hədəfə alınması heç bir halda əsaslandırıla bilməz.

Beynəlxalq humanitar hüquq mülki obyektlərin qorunmasını açıq şəkildə tələb edir. Bu qaydalar silahlı münaqişələr zamanı belə mülki əhalinin və onların istifadə etdiyi infrastrukturların qorunmasını təmin etməyə yönəlib. Buna baxmayaraq, Naxçıvanda mülki obyektin hədəfə alınması bu prinsiplərin açıq şəkildə pozulması kimi qiymətləndirilir.

Azərbaycan illərdir ki, regionda sabitliyin və əməkdaşlığın möhkəmlənməsi üçün müxtəlif təşəbbüslərlə çıxış edir. Ölkə qonşu dövlətlərlə qarşılıqlı hörmət və etimad əsasında münasibətlərin qurulmasına böyük önəm verir. Azərbaycan heç vaxt qonşu ölkələr üçün təhlükə mənbəyi olmayıb və öz ərazisindən başqa dövlətlərə qarşı hər hansı təhdid yaradacaq fəaliyyətə yol verməyib.

Belə bir şəraitdə Naxçıvan ərazisində mülki obyektin dron hücumu ilə hədəfə alınması regionda gərginliyi artıran və təhlükəli nəticələrə gətirib çıxara biləcək addımdır. Bu cür hadisələr dövlətlər arasında etimadı sarsıdır və sabitliyə ciddi zərbə vurur.

Regionda sabitliyin qorunması üçün bütün tərəflər məsuliyyətli davranmalıdır. Hər hansı bir hərbi və ya texniki vasitədən istifadə etməklə mülki infrastrukturu hədəfə almaq vəziyyəti daha da gərginləşdirir. Bu isə yalnız qarşıdurmanın artmasına xidmət edir.

Beynəlxalq ictimaiyyət belə hadisələrə prinsipial münasibət bildirməlidir. Dövlətlərin suverenliyi və ərazi bütövlüyü beynəlxalq münasibətlərin əsas prinsiplərindəndir. Bu prinsiplərin pozulması regionda yeni münaqişə riskləri yaradır və təhlükəsizlik mühitini daha da mürəkkəbləşdirir.

Naxçıvana qarşı dron hücumu məhz belə riskləri artıran hadisədir. Bu səbəbdən baş verən hadisəyə aydınlıq gətirilməsi, məsuliyyətin müəyyən olunması və gələcəkdə belə halların təkrarlanmaması üçün tədbirlərin görülməsi böyük əhəmiyyət daşıyır.

Azər SÜLEYMANOV,
Yeni Azərbaycan Partiyası Nəsimi rayon təşkilatının sədri