Ümummilli lider Heydər Əliyevin 100 illiyi və DOST Agentliyinin yaradılmasının 5 illiyi münasibətilə Azərbaycanda ilk dəfə sosial xidmətlər sahəsində “DOST 2023: çevik, innovativ və davamlı xidmətlərin göstərilməsi üçün vahid platforma” adlı beynəlxalq konfrans keçirilib. Heydər Əliyev Mərkəzində təşkil edilən və iki gün davam edən konfransda 50 xarici, 110 yerli qonaq, eləcə də 40 beynəlxalq təşkilat iştirak edib.
Əmək və əhalinin sosial müdafiəsi naziri Sahil Babayev tədbiri açaraq bildirib ki, ötən əsrin 90-cı illərində müstəqil Azərbaycan dövlətini uzunmüddətli inkişaf yoluna səfərbər edən ulu öndər Heydər Əliyev tərəfindən ölkəmizin uğurlu sosial inkişaf strategiyası yaradılıb. Bu strategiya Prezident İlham Əliyev tərəfindən mükəmməl islahatlarla davam və inkişaf etdirilir.
Nazir dövlət başçımızın tapşırıqları ilə son beş ildə 4 sosial islahat paketi icra olunduğunu, bu islahatlar üzrə ayrılan əlavə illik vəsaitin 7 milyard manata çatdığını, sosial ödənişlərdəki ciddi artımları, dövlət sosial xidmətlərinin geniş miqyasda elektronlaşdırılması istiqamətində uğurları diqqətə çatdırıb.
DOST konsepsiyasının son illər aparılan sosial islahatların mühüm nailiyyətlərindən olduğu vurğulanıb. Bildirilib ki, DOST mərkəzlərində 159 xidmət “bir pəncərə”dən, innovativ texnologiyalarla, modern və çevik, tam şəffaf mexanizmlər üzərində təqdim edilir. DOST ölkəmizin bu sahədə yeni brendini formalaşdırıb.
2019-cu ildən DOST Agentliyi və 7 DOST Mərkəzi, işğaldan azad olunmuş Zəngilanın Ağalı kəndində ilk Smart DOST xidmət məntəqəsi açılıb. DOST mərkəzlərində ötən dövrdə 1 milyon 730 min vətəndaşa xidmət göstərilib. Həmin xidmətlərdən vətəndaş məmnunluğu 98,2 faizə çatdırılıb.
“Könüllü DOST” proqramının uğurlarından da bəhs olunub. DOST konsepsiyasının beynəlxalq səviyyədə də yüksək dəyərləndirildiyi, agentliyin 13 beynəlxalq mükafata və sertifikata (Avropa Sosial Şəbəkəsinin “Avropa Sosial Xidmətlər Mükafatı”, Beynəlxalq Sosial Təminat Assosiasiyasının 3 mükafatı, Mükəmməllik sertifikatları və s.) layiq görüldüyü, bir çox ölkələrin Azərbaycanın DOST təcrübəsini tətbiq etməyə maraq göstərdiyi vurğulanıb. Ümumilikdə, Azərbaycanda son 5 ildə aparılan sosial islahatların uğurlarının təkcə keçən il və bu ilin ötən dövründə 40-a yaxın beynəlxalq mükafat və sertifikatla təltif edildiyi bildirilib.
Qeyd olunub ki, DOST modelinin unikallığı, qazanılmış nailiyyətlər əsasında faydalı təcrübə mübadiləsinə şərait yaradan bu konfransın məqsədlərindən biri də yerli və beynəlxalq ekspertləri bir araya gətirməklə dövlət sosial xidmətləri sahəsində müasir texnologiyaların, innovativ həllərin geniş tətbiqinə əsaslanan inkişaf perspektivlərinin, gələcək inkişaf yollarının müəyyənləşdirilməsidir.
Konfransda fəxri qonaqlar qismində Avropa Sosial Şəbəkəsinin sədri Kristian Fillet, Azərbaycan Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, BMT-nin rezident əlaqələndiricisi V. Andreyeva, rəqəmsal inkişaf və nəqliyyat nazirinin müavini Samir Məmmədov müxtəlif mövzularda çıxış ediblər.
Konfransda iki plenar və üç paralel iclasda yerli və beynəlxalq ekspertlər müxtəlif mövzularda təqdimatlar ediblər.
Zərifə BƏŞİRQIZI
XQ
