Azərbaycanın Özbəkistandakı səfirliyi nəzdindəki Heydər Əliyev adına Azərbaycan Mədəniyyət Mərkəzində Azərbaycan və Özbəkistan arasında ədəbi-mədəni əlaqələrin inkişafına həsr olunmuş nəşrlərin təqdimat mərasimi keçirilib.

Tədbirdə tanınmış publisist, “Xalq qəzeti”nin Türküstan üzrə xüsusi müxbiri Qulu Kəngərlinin tərtib etdiyi “Qəlbimiz bir döyünür” almanaxı, “Ədəbi və əbədi körpü” kitabları, həmçinin  müəllifi olduğu “Keçmiş unudulmayanda tarixə dönür” və “İki xalqın oğlu: Firudin Səfərov” kitablarının təqdimatı keçirilib. 

“Qəlbimiz bir döyünür” almanaxı, “Ədəbi və əbədi körpü” kitabının layihə müəllifi və tərcüməçisi İsmayıllıda yaşayan tanınmış şair və tərcüməçi Şahməmməd Dağlaroğludur.

Mərasimi giriş sözü ilə açan Heydər Əliyev adına Azərbaycan Mədəniyyət Mərkəzinin rəhbəri Akif Marifli Azərbaycan və Özbəkistan xalqları arasında dostluq, qardaşlıq və mənəvi yaxınlığın dərin tarixi köklərə əsaslandığını bildirib. Çıxışda Azərbaycan Prezidenti İlham Əliyevin və Özbəkistan Prezidenti Şavkat Mirziyoyevin siyasi iradəsi və xüsusi diqqəti nəticəsində iki ölkə arasında strateji tərəfdaşlığın, o cümlədən mədəni-humanitar əməkdaşlığın ardıcıl şəkildə inkişaf etdiyi xüsusi vurğulanıb. Bu kontekstdə  təqdim olunan nəşrlərin Azərbaycan və Özbəkistan arasında ədəbi-mədəni əlaqələrin sistemli şəkildə araşdırılması, ortaq tarixi yaddaşın qorunması, eləcə də iki qardaş xalqın söz, sənət və mədəniyyət xadimlərinin geniş oxucu auditoriyasına tanıdılması baxımından mühüm elmi-publisistik dəyər daşıdığı qeyd olunub.

Tədbirdə çıxış edən Özbəkistanın ədəbi ictimaiyyətinin nümayəndələri Nurxan Əlimirzəyeva və Mənzurə Bəxtiyor təqdim olunan nəşrlərin Azərbaycan və Özbəkistan arasında ədəbi-mədəni münasibətlərin zəngin məzmununu əks etdirdiyini bildiriblər. Çıxışlarda bu nəşrlərin yalnız ədəbi hadisə deyil, həm də Azərbaycan-Özbəkistan dostluğunu, mənəvi yaxınlığını və humanitar əməkdaşlığını gücləndirən mühüm mədəni töhfə olduğu vurğulanıb.

“Qəlbimiz bir döyünür” almanaxı və “Ədəbi və əbədi körpü” kitablarının tərtibçisi Qulu Kəngərli Şahməmməd Dağlaroğlu ilə yaradıcılıq əlaqələrindən danışıb, şair və tərcüməçinin indiyədək özbək poeziyası ilə bağlı 11 kitabının çap olunduğunu bildirib.  

“Keçmiş unudulmayanda tarixə dönür” və “İki xalqın oğlu: Firudin Səfərov” kitablarının müəllifi Qulu Kəngərli çıxışında nəşrlərin ərsəyə gəlməsi prosesindən danışaraq qeyd edib ki, uzun illərin müşahidələri, araşdırmaları və ədəbi əlaqələrə olan dərin maraq nəticəsində ərsəyə gələn bu nəşrlər iki qardaş xalq arasında söz və sənət körpüsünü daha da möhkəmləndirməyə xidmət edir. O vurğulayıb ki, təqdim olunan kitablar gələcək nəsillər üçün Azərbaycan-Özbəkistan ədəbi-mədəni münasibətlərinin öyrənilməsində dəyərli mənbə kimi xüsusi əhəmiyyət daşıyır.

Qeyd olunub ki, “Qəlbimiz bir döyünür” almanaxında müasir özbək ədəbiyyatının 36 nümayəndəsinin Azərbaycan dilinə tərcümə edilmiş şeirləri, “Ədəbi və əbədi körpü” antologiyasında isə 11 Azərbaycan və 11 özbək şairinin poetik nümunələri yer alıb. “Keçmiş unudulmayanda tarixə dönür” kitabında  taleyi Türküstanla  bağlı olan azərbaycanlıların həyat yoluna nəzər salınıb, “İki xalqın oğlu: Firudin Səfərov” nəşri isə görkəmli opera rejissoru, Azərbaycanın və Özbəkistanın Xalq artisti Firudin Səfərovun yaradıcılığına həsr edilib.

Ümumilikdə, təqdim olunan nəşrlərin Azərbaycan və Özbəkistan arasında ədəbi əlaqələrin genişlənməsinə, mədəni-humanitar əməkdaşlığın möhkəmlənməsinə və qarşılıqlı yaradıcılıq mübadiləsinin inkişafına mühüm töhfə verdiyi bildirilib. 

Məsaim Abdullayev

XQ