ölkənin idarəçilik mədəniyyətinin gələcək inkişaf istiqamətlərinin müəyyənləşdirilməsi baxımından xüsusi əhəmiyyət daşıyır.
Prezident İlham Əliyev çıxışında ilk növbədə dövlətə xidmət prinsipini önə çəkərək bildirdi ki, rəhbər vəzifəyə təyin olunan hər bir şəxs xalqa xidmət etməyi fəaliyyətinin əsas istiqaməti kimi qəbul etməlidir. Xalqla bir yerdə olmaq, onların problemlərini bilmək və operativ şəkildə həll etmək icra başçılarının fəaliyyətinin əsas meyarı kimi müəyyən edilmişdir. Dövlət başçısı diqqətə çatdırdı ki, vəzifə sahibi üçün təvazökarlıq, sağlam mənəvi mühit və şəxsi nümunə xüsusi əhəmiyyət daşıyır. Məmur təkcə öz davranışı ilə deyil, ailə üzvlərinin də davranışı ilə cəmiyyətə nümunə olmalıdır.
Prezident qeyd etdi ki, bəzi hallarda məmurların təkəbbürlü davranışı, cəmiyyətdən uzaqlaşması, özünü hamıdan üstün tutması onların nüfuzunu ciddi şəkildə zədələyir və dövlət siyasətinə kölgə salır. Bu cür hallar dövlət başçısı tərəfindən qətiyyətlə pislənildi və bildirildi ki, qanunsuzluq edən hər bir məmur mütləq hüquqi məsuliyyətə cəlb olunacaq. Əyri yola gedən şəxslərin fəaliyyətinin nəticəsiz qalmadığı, bu gün də belə halların mövcud olduğu, lakin dövlətin bunlara qarşı ardıcıl mübarizə apardığı xüsusi vurğulandı.
Dövlət başçısı korrupsiya, rüşvətxorluq hallarının köklü şəkildə aradan qaldırılmasının dövlət siyasətinin prioritet istiqamətlərindən biri olduğunu qeyd etdi. Kadr siyasətinin şəffaf, peşəkar və mənəvi cəhətdən təmiz şəxslər üzərində qurulması Prezidentin yeni təyinat alan məmurlara əsas tapşırıqlarındandır. O da bildirildi ki, mərkəzi icra hakimiyyəti orqanlarında aparılan kadr islahatları nəticəsində sistem əhəmiyyətli dərəcədə sağlamlaşdırılmışdır və artıq mərkəzdən qanunsuz göstərişlərin verilməsi praktikasına son qoyulub.
Çıxışın mühüm hissələrindən biri bölgələrdə infrastrukturun inkişafı ilə bağlı məlumatlar idi. Elektrik enerjisi təminatından tutmuş magistral yolların, kənd yollarının, içməli su layihələrinin, sosial infrastruktur obyektlərinin tikintisinə qədər son illər görülən işlər bir daha dövlət siyasətinin bölgələrin inkişafına yönəldiyini göstərir. Prezident qeyd etdi ki, bu gün Azərbaycanın bütün şəhərlərində müasir xəstəxanaların fəaliyyət göstərməsi, kəndlərdə suvarma infrastrukturunun yaxşılaşdırılması, qazlaşdırmanın genişlənməsi insanların həyat səviyyəsinin yüksəldilməsinə xidmət edir.
Məşğulluq məsələləri də icra başçılarının üzərinə qoyulan mühüm vəzifələr sırasındadır. Dövlətin sahibkarlara dəstək verməsi, güzəştli kreditlərin ayrılması, özünüməşğulluq proqramının genişlənməsi bölgələrdə yeni iş yerlərinin açılmasına şərait yaradır. Lakin bu sahədə yerli icra hakimiyyəti orqanlarının aktiv rolu xüsusi vacib hesab olunur. Dövlət başçısı vurğuladı ki, bölgələrdə işsizlik səviyyəsinin azalması həm sosial rifahın artmasına, həm də miqrasiyanın qarşısının alınmasına xidmət edir.
Ekoloji tarazlıq məsələsi də Prezident tərəfindən ayrıca vurğulanmışdır. Ekologiyaya ziyan vuran hər bir qanunsuz fəaliyyətin qarşısı qətiyyətlə alınmalı, çay məcralarının dəyişdirilməsi, qum-çınqıl yataqlarının qanunsuz istismarı kimi faktlara yol verilməməlidir. Dövlət başçısının Bakı və Sumqayıtda aparılmış ekoloji rekultivasiya işləri barədə qeyd etdiyi nümunələr bu siyasətin ölkə üzrə geniş miqyasda həyata keçirildiyini göstərir.
Prezident İlham Əliyevin yeni təyin olunan icra başçıları ilə görüşü müasir dövlət idarəçiliyinin əsas prinsiplərinin bir daha təsdiqi kimi qiymətləndirilə bilər. Xalqa xidmət, şəffaflıq, məsuliyyət, korrupsiyaya qarşı barışmaz mövqe, sosial ədalət, infrastrukturun inkişafı, məşğulluğun artırılması və ekoloji tarazlığın qorunması dövlətin prioritet istiqamətləridir. Bu görüş həm də yeni təyinat alan rəhbərlərə göstərilən etimadın nə qədər böyük məsuliyyət tələb etdiyini ortaya qoyur. Prezidentin sərt və prinsipial mövqeyi ondan xəbər verir ki, ölkədə idarəçilik sisteminin təkmilləşdirilməsi prosesi ardıcıl şəkildə davam edəcək və hər bir məmur bu siyasətə uyğun fəaliyyət göstərməyə borcludur.
Azər SÜLEYMANOV,
Yeni Azərbaycan Partiyası Nəsimi rayon təşkilatının sədri
