Futbolun, sadəcə idman olmadığını, böyük siyasətin, milli imicin və ölkə potensialının dünyaya nümayiş olunduğu mühüm platforma olduğunu bir daha xatırladan mövzudan danışacağıq. UEFA Çempionlar Liqasının qrup mərhələsinin sonuncu turunda “Liverpul” qarşısında 0:6 hesablı məğlubiyyət ilk baxışdan acı görünə bilər. Lakin futbolun yalnız tabloya yazılan hesabdan ibarət olmadığını anlayanlar üçün bu nəticə ümumi mənzərənin cüzi bir detalıdır. Əsas məqam ondan ibarətdir ki, “Qarabağ” futbol klubu bütün çətinliklərə baxmayaraq pley-off mərhələsinə vəsiqəni təmin etdi və bununla da Azərbaycan futbol tarixində daha bir əlamətdar səhifə açdı.

Müasir dünyada futbol sadəcə idman növü deyil – o, böyük siyasətin, yumşaq gücün və milli imicin formalaşdırılmasının ən təsirli alətlərindən biridir. Stadionlarda səslənən himnlər, milyonlarla tamaşaçının izlədiyi oyunlar, dünya mediasının diqqəti bir ölkənin adını, bayrağını və hekayəsini qlobal auditoriyaya çatdırır. Bu mənada “Qarabağ”ın Çempionlar Liqasındakı çıxışı təkcə idman uğuru yox, Azərbaycanın potensialının, dözümlülüyünün və iddiasının nümayişidir.

“Liverpul” kimi futbol nəhəngi ilə eyni meydanda olmaq, Avropanın ən güclü klubları ilə bir sırada mübarizə aparmaq artıq özü-özlüyündə mesajdır: Azərbaycan futbolu regional çərçivəni aşaraq böyük oyunun bir hissəsinə çevrilib. Hesabdakı fərq resurslar, büdcələr və illərlə formalaşmış futbol məktəbləri arasındakı fərqi göstərsə də, pley-off mərhələsinə yüksəlmək iradənin, sistemli işin və strateji yanaşmanın nəticəsidir.

“Qarabağ” klubu bu illər ərzində yalnız meydanda qol vurmayıb, həm də ölkənin adını Avropanın futbol xəritəsində sabitləşdirib. Klubun adı çəkiləndə artıq təkcə bir komanda yox, Qarabağ bölgəsinin taleyi, Azərbaycanın müasir siması, mübarizə və dirəniş hekayəsi xatırlanır. Bu, futbolun siyasətə toxunduğu, idmanın diplomatiyaya çevrildiyi nöqtədir.

Beləliklə, “Liverpul”a qarşı məğlubiyyət pley-off mərhələsinə aparan yolun üzərindəki epizodlardan biridir. Əsas nəticə isə ondan ibarətdir ki, “Qarabağ” Avropanın ən böyük səhnəsində qalmaqda davam edir və Azərbaycanı dünyaya tanıtmaq missiyasını növbəti mərhələdə də daşıyacaq. Bu, təkcə idman uğuru yox, həm də Azərbaycanın adının dünya futbol xəritəsində möhkəmlənməsi, ölkənin potensialının və iddiasının nümayişidir. Böyük hesablar zamanla unudulur, amma böyük iştirak və böyük mövcudluq tarixdə qalır.

Səbuhi MƏMMƏDOV
XQ