Bizi Telegram-da da izləyə bilərsiniz:@xqazeti

Qazaxıstanın Fövqəladə Hallar Nazirliyi ölkənin ən böyük şəhəri olan Almatıda keçirilən xilasetmə əməliyyatlarında yüksək səmərəlilik nümayiş etdirən "Tesla Cybertruck" elektrik pikaplarının əlavə partiyasının satın alınacağını rəsmən təsdiqləyib. Nazir müavini Yerbolat Sadırbayev hökumətin iclasında bildirib ki, Almatı rəhbərliyinə verilən ilk "Cybertruck" xüsusilə şəhəri əhatə edən çətin dağlıq relyefdə real xilasetmə missiyaları zamanı özünü tam doğruldub. Mütəxəssislər bu elektromobilin bir neçə mühüm üstünlüyünü xüsusi vurğulayıblar; bura kələ-kötür yollarda yüksək hərəkət qabiliyyəti, rabitə və xüsusi avadanlıqları cərəyanla təmin edən daxili enerji sistemi, həmçinin uzunmüddətli əməliyyatlar üçün iritutumlu avtonom enerji mənbəyi daxildir. Nazirlik bu moddellərlə bütün avtoparkı əvəz etmək niyyətində deyil, ənənəvi yanğınsöndürən və təcili yardım maşınları strukturun əsası olaraq qalacaq, "Tesla" isə operativ çevik reaksiya vasitəsi kimi xidmət edəcək.

Xilasedicilərlə yanaşı, Qazaxıstanın Dövlət Mühafizə Xidməti də bu yaxınlarda, mayın 15-də Türkistanda keçirilən Türk Dövlətləri Təşkilatının qeyri-formal sammiti zamanı "Cybertruck" modellərini mobil komanda-qərargah maşını kimi xidmətə cəlb edib. Mühafizə orqanlarının məlumatına görə, bu seçim "Tesla" brendinin reklamı üçün deyil, sırf avtomobilin yüksək enerji potensialı və infrastruktur olmayan çöl şəraitində belə dərhal rəqəmsal rabitə şəbəkələri qura bilmək qabiliyyətinə görə edilib.

Bu addım İlon Maskın şirkəti üçün böyük rəmzi məna daşıyır. Belə ki, "Tesla" hazırda daxili bazarda "Cybertruck" modelinə tələbatın kəskin azalması böhranı ilə mübarizə aparır və hər bir potensial alıcı üçün mübarizə aparır. Rəsmi rəqəmlərə görə, pikapın satışı ötən il 48 faiz geriləyərək təxminən 20 min ədəd təşkil edib ki, bu da şirkətin ilkin planlaşdırdığı illik 250 minlik istehsal hədəfindən çox uzaqdır. Cari ilin birinci rübündə cəmi 3 519 ədəd "Cybertruck" satılıb, üstəlik, qeydiyyat məlumatları göstərir ki, bu rəqəmin də 1 279 ədədini İlon Maskın digər şirkəti "SpaceX" süni şəkildə satın alaraq statistikaya kömək edib. Avropa İttifaqının sərt təhlükəsizlik qaydalarına uyğun gəlmədiyi üçün Avropaya ixracı qadağan edilən bu zirehli model üçün "Tesla" cari ilin yanvarından etibarən Yaxın Şərq bazarlarına da çıxış axtarır.

Hazırladı: 

Arzu ƏLİYEVA
XQ