Avropa İttifaqı Rusiyaya qarşı tətbiq etdiyi sanksiyalar paketini daha da genişləndirib. Yeni qərara əsasən, sanksiya siyahısına 80-dən çox fiziki və hüquqi şəxs əlavə olunub.

Məlumata görə, siyahıya daxil edilən şəxslər arasında Rusiya Prezidenti Vladimir Putinin yaxın çevrəsinə aid hesab edilən Simferopol və Krım mitropoliti Tixon (Şevkunov) da var. Bir sıra Qərb KİV-ləri onu uzun illərdir "Putinin mənəvi rəhbəri" və ya "spiritual mentoru" kimi təqdim edir.

Aİ rəsmiləri bildirirlər ki, yeni məhdudiyyətlər Rusiyanın siyasi, iqtisadi və informasiya sahələrində fəaliyyət göstərən şəxslər və qurumları əhatə edir. Məqsəd Moskvanın beynəlxalq siyasətinə təzyiqi artırmaq və Ukrayna müharibəsi ilə bağlı mövqeyinə təsir göstərməkdir.

Rusiyada nüfuzlu dini xadimlərdən biri hesab olunan mitropolit Tixonun sanksiya siyahısına daxil edilməsi xüsusi diqqət çəkib. O, uzun illərdir Rus Pravoslav Kilsəsinin tanınmış simalarından biri kimi çıxış edir və Kremlə yaxınlığı ilə seçilir.

Moskva isə Qərbin yeni sanksiyalarını qeyri-qanuni və siyasi motivli addım kimi qiymətləndirir. Rusiya rəsmiləri bildirirlər ki, bu cür qərarlar Avropa ilə münasibətlərin daha da gərginləşməsinə səbəb olur.

Ekspertlərin fikrincə, Aİ-nin son qərarı Rusiyanın yalnız siyasi və iqtisadi deyil, həm də ictimai və dini elitasına qarşı təzyiq mexanizmlərini genişləndirdiyini göstərir. Bu isə sanksiya siyasətinin yeni mərhələyə keçdiyindən xəbər verir.

S.ELAY

XQ