Xəzər dənizinin Azərbaycan sektorundakı neft-qaz layihələrinin uğuru həm də əməliyyatçının ölkə əhalisi üçün bu layihələr vasitəsilə hiss edilən faydalar yaratmaq bacarığından asılıdır. Buna nail olmaq üçün regionda mühüm neft və qaz layihələrinin əməliyyatçısı olan BP şirkəti və tərəfdaşları mühüm sosial investisiya proqramları həyata keçirməyə davam edir.
Həmin layihələrə təhsil proqramları, yerli icmalarda bacarıq və qabiliyyətlərin yaradılması vasitəsilə yeni imkanların açılması, icmalarda sosial infrastrukturun təkmilləşdirilməsi, maliyyə vəsaitlərinə çıxışın təmin edilməsi və təlim vasitəsilə yerli müəssisələrə dəstək, mədəni irs və idmanın inkişafına dəstək, eləcə də hökumət qurumlarına texniki yardım daxildir.
2025-ci ilin birinci yarısında BP və onun əməliyyatçısı olduğu “Azəri-Çıraq-Günəşli”, Bakı-Tbilisi-Ceyhan, “Şahdəniz” və Cənubi Qafqaz Boru Kəməri layihələrdəki tərəfdaşları belə sosial investisiya layihələrinə Azərbaycanda, təxminən, 0,7 milyon dollar vəsait xərcləyiblər. İlin ilk 6 ayı ərzində bu layihələrə hazırda davam edən 17 təhsil və yerli bacarıqların yaradılmasını, eləcə də sahibkarlığın inkişafını dəstəkləyən 1 proqram daxil idi.
Bundan əlavə, BP ayrıca bir şirkət kimi öz adından Azərbaycanda sponsorluq etdiyi layihələrə ilin birinci yarısında təxminən 0,4 milyon dollar vəsait xərcləyib. Bunlara hazırda davam edən 19 təhsil təşəbbüsü, yerli bacarıqların yaradılmasını və sahibkarlığın inkişafını dəstəkləyən 1 layihə, ətraf mühit üzrə 5 təşəbbüs və müxtəlif mövzularda 7 konfrans və seminara dəstək kimi, ümumilikdə, 32 layihə daxildir.
