İqtisadi İslahatların Təhlili və Kommunikasiya Mərkəzinin bir qrup əməkdaşı “Su ehtiyatlarından səmərəli istifadəyə dair Milli Strategiya”nın icrasının monitorinq və qiymətləndirilməsi məqsədilə regionlarda səfərdə olub. Onlar strategiyada nəzərdə tutulan tədbirlərə və uğurla icra olunan layihələrə yerində baxış keçiriblər.
Nümayəndə heyətinə Dövlət Su Ehtiyatları Agentliyi, Kənd Təsərrüfatı, Fövqəladə Hallar, Ekologiya və Təbii Sərvətlər nazirlikləri, eləcə də yerli icra qurumları əməkdaşlarının da daxil olduqları səfər çərçivəsində Şabran rayonunda Taxtakörpü su anbarı, suvarılan torpaqlar üçün mövcud suvarma kanallarının yaxşılaşdırılması, Quba rayonunda içməli su təhcizatı üzrə 6,5 kilometr magistral su kəməri və sutəmizləyici qurğu mərkəzi və Qudyalçayda sahilbərkitmə işləri, Qırmızı qəsəbədə yaşayış evlərinin və həyətyanı sahələrin sel və daşqın sularından mühafizəsi ilə bağlı görülən işlər təhlil edilib.
Sonra Qusar rayonunda Samur – Abşeron kanalı, Xaçmaz rayonunda Vəlvələçay keçidində 1-ci Şollar su kəmərində sel sularından mühafizə sistemi, Qəbələ rayonunda Türyançay sol və sağ sahil kanallarının yenidən qurulması, Oğuz rayonunda Oğuz – Qəbələ – Bakı su kəməri, Əlicançay su anbarının tikintisi, Şəki rayonunda Kişçay və Qanıxçayın betonlanması və təmizlənməsi, Mingəçevir su anbarında və Şəmkirçay su anbarında həyata keçirilən yenidənqurma layihələri ilə ətraflı tanışlıq olub.
Mərkəzin icraçı direktoru Vüsal Qasımlı bildirib ki, sözügedən milli strategiya çərçivəsində nəzərdə tutulan layihələr uğurla icra olunur, irimiqyaslı layihələr üzrə işlər sürətlə davam edir. Həmin strategiyanın icrası su ehtiyatlarının artırılmasını, keyfiyyətli içməli su və suvarma suyu ilə təminatın yaxşılaşdırılmasını, bu sahədə idarəetmənin müasirləşdirilməsini nəzərdə tutur.
Strategiyanın icrası çərçivəsində su ehtiyatlarının qiymətləndirilməsi və proqnozlaşdırılması sisteminin təkmilləşdirilməsi, su ehtiyatlarının səmərəli idarə edilməsi, su ehtiyatlarından səmərəli istifadə, su təhlükəsizliyinin gerçəkləşdirilməsi, Qarabağ və Şərqi Zəngəzurun su ehtiyatları potensialından istifadə layihələri uğurla icra olunur.
Qeyd edək ki, Prezident İlham Əliyevin 10 oktyabr 2024-cü il tarixli sərəncamına əsasən, adı çəkilən milli strategiyada nəzərdə tutulmuş tədbirlərin icrasının monitorinqini və qiymətləndirilməsini Nazirlər Kabinetinin sifarişi əsasında İqtisadi İslahatların Təhlili və Kommunikasiya Mərkəzi həyata keçirir.
