Məşhur Hollivud rejissoru Stiven Spilberq yeni fantastik filmi “Açıqlama günü” (Disclosure Day) ilə bağlı verdiyi müsahibədə yenidən geniş müzakirələrə səbəb olub. Rejissor ABŞ-ın CBS telekanalına müsahibəsində yadplanetlilərin Yerə gəldiyinə və hətta hazırda burada olduqlarına inandığını bildirib. Bu açıqlama dünya mediasında geniş işıqlandırılsa da, elm ictimaiyyətinin əksər nümayəndələri belə fikirlərin sübut olunmadığını vurğulayırlar.

CBS News-un yaydığı müsahibədə Spilberq bildirib ki, ömrü boyu topladığı məlumatlar, sənədli filmlər və ABŞ Konqresində naməlum uçan obyektlərlə  bağlı dinlədiyi ifadələr əsasında “onların burada olduqlarına” inandığını düşünür. Rejissor hətta “bəlkə də onlar həmişə burada olublar” fikrini də səsləndirib.

Mövzu ilə bağlı məlumatlar ilk növbədə CBS News-da dərc olunub və sonradan  digər nüfuzlu media qurumları tərəfindən yayılıb.

Qeyd etmək lazımdır ki, Spilberqin açıqlamaları şəxsi inanc xarakteri daşıyır. Rejissor uzun illərdir yadplanetli həyat mövzusuna maraq göstərir və onun yaradıcılığında bu mövzu xüsusi yer tutur. Yeni filmi də məhz insanlığın yadplanetli sivilizasiyalarla mümkün təması və bunun gizli saxlanılması ehtimalı üzərində qurulub.

Lakin elmi baxımdan vəziyyət fərqlidir. Astronomlar və astrofiziklər kainatda başqa həyat formalarının mövcud olmasının mümkünlüyünü qəbul etsələr də, Yerə yadplanetlilərin gəldiyini təsdiqləyən etibarlı elmi sübutun olmadığını bildirirlər. Son illərdə ABŞ-də naməlum hava hadisələri (UAP) ilə bağlı bir sıra hesabatlar və dinləmələr keçirilsə də, bu hadisələrin extraterrestrial mənşəli olduğunu təsdiq edən faktlar ortaya qoyulmayıb. Məhz buna görə elmi ictimaiyyət Spilberqin fikirlərini maraqlı fərdi mövqe kimi qiymətləndirir, lakin onları elmi nəticə hesab etmir.

Mütəxəssislərin fikrincə, kainatın böyüklüyü nəzərə alınarsa, Yerdənkənar həyatın mövcudluğu ehtimalı yüksəkdir. Bununla belə, ehtimal ilə sübut eyni anlayış deyil. Elmdə hər hansı iddianın qəbul edilməsi üçün müşahidə, təkrar yoxlama və müstəqil təsdiq tələb olunur. Hazırkı mərhələdə isə belə sübutlar mövcud deyil.

Nəticə etibarilə, Stiven Spilberqin səsləndirdiyi fikirlər daha çox onun şəxsi dünyagörüşünü və uzun illərdir maraq göstərdiyi elmi-fantastik mövzulara münasibətini əks etdirir. Rejissorun bəyanatı ictimai maraq doğursa da, elm adamlarının mövqeyi dəyişməz qalır: yadplanetlilərin Yer kürəsində olduqlarını təsdiqləyən etibarlı elmi faktlar hələlik mövcud deyil. Buna görə də məsələ elmi həqiqətdən çox, araşdırılmaqda olan bir fərziyyə kimi qiymətləndirilməlidir.

Nurəngiz Adilqızı

XQ