Bundesver 2025-ci ildə Rusiyanın NATO-nun şərq cinahına “hücum” ehtimalını nəzərdən keçirir. Bu barədə Almaniyanın "Bild" tabloidinin əldə etdiyi mümkün münaqişənin gizli ssenarisində deyilir.
Agentlik yazır ki, Almaniya Müdafiə Nazirliyi gizli sənəddə 2025-ci ilin yayında son nəticədə müharibəyə səbəb ola biləcək hadisələrin necə inkişaf edə biləcəyini ətraflı təsvir edir. "Bild" qeyd edir ki, o, sənədin məzmununu təhlükəsizlik baxımından NATO qoşunlarının hərəkəti ilə bağlı təfərrüatlar olmadan təkrar edir.
Ssenaridə təsvir olunan hadisələr 2024-cü ilin fevralından başlayır. Rusiya növbəti səfərbərlik dalğasına başlayır və daha 200 min nəfəri orduya çağırır. Bundan sonra Kreml yaz hücumuna başlayır ki, bu da Qərbin Ukraynaya yardımının zəifləməsi ilə nəticələnəcək və Rusiya ordusuna yeni ərazilər tutmağa imkan verəcək.
Ssenariyə görə, Rusiyanın NATO blokuna hücumu əvvəlcə gizli, sonra isə açıq şəkildə iyul ayında başlayacaq. Əsasən Baltikyanı ölkələrdə kiberhücumlar və hibrid müharibənin digər formaları böhranlara səbəb olacaqdır. Eyni zamanda, Rusiya Estoniya, Latviya və Litvada etnik rusları təhrik etməyə başlayacaq. Bundesverin ssenarisinə görə, Rusiyanın sentyabr ayında Rusiya və Belarusun qərb bölgələrində 50 min əsgərin iştirakı ilə "Qərb-2024" genişmiqyaslı təlimlərinə başlamaq üçün bəhanə kimi istifadə etdiyi qarşıdurmalar olacaq.
Rusiya 2021-ci ildə olduğu kimi, təlimlər bəhanəsi ilə Polşa və Litva ilə sərhəddə qoşunlarının sayını artıracaq. Rusiya oktyabrda Kalininqrada əlavə qüvvələr və orta mənzilli raketlər yerləşdirəcək. Kremlin gizli məqsədi Kalininqradı Belarusla birləşdirəcək Suvalki dəhlizinə nəzarət etməkdir.
Bunun üçün 2024-cü ilin dekabrında Suvalki dəhlizi ərazisində iğtişaşlar və çoxsaylı insan tələfatı ilə müşayiət olunan sərhəd münaqişəsi yaranacaq. Bütün bunlar ABŞ prezidentinin dəyişə biləcəyi bir vaxtda baş verəcək və 2014-cü ildə Şərqi Ukraynaya müdaxilə NATO ərazisində de-fakto təkrarlanacaq.
Bundesver ssenarisinə görə, Suvalki dəhlizindəki münaqişədən sonra Rusiya BMT Təhlükəsizlik Şurasının növbədənkənar iclasını çağıracaq və orada Qərbi Rusiyaya hücum hazırlamaqda ittiham edəcək. 2025-ci ilin yanvarında NATO Şurasının xüsusi iclası keçiriləcək və orada Polşa və Baltikyanı ölkələr Rusiyadan artan təhlükə barədə məlumat verəcəklər.
2025-ci ilin martında Rusiya Baltikyanı ölkələrlə sərhədlərə əlavə qoşun yeridəcək. Təkcə Belarusda Kremlin iki tank diviziyası və motoatıcı diviziyası, ümumilikdə 70 mindən çox əsgəri olacaq.
2025-ci ilin mayında, Bundesver ssenarisinə görə, NATO Rusiyanın Suvalki dəhlizinə hücumunun qarşısını almaq üçün “qanunverici tədbirlər” haqqında qərar verəcək. Bölgədə 30 min alman əsgəri yerləşdiriləcək.
Nəşr yazır ki, bu ssenari çox güman ki, NATO təlimlərinin əfsanəsi sayılacaq.
Bundesverdə "Bild"ə bildirilib ki, "müxtəlif ssenariləri nəzərə almaq, hətta onlar çox çətin olsa da, gündəlik hərbi işlərin, xüsusən də təlimlərin bir hissəsidir".
XQ
