Rusiya prezidenti Vladimir Putinlə ABŞ lideri Donald Trampın xüsusi nümayəndəsi Stiven Uitkoff arasında bu həftə görüşün mümkünlüyü istisna edilmir. Bu barədə avqustun 4-də Kremlin sözçüsü Dmitri Peskov məlumat verib.

Xəbəri “İzvestiya.ru” yayıb. 

“Biz belə bir görüşün keçirilməsinin mümkünlüyünü istisna etmirik”, - o, brifinqdə qeyd edib.

Rusiya prezidentinin mətbuat katibi ikitərəfli dialoqun davam etdiyini vurğulayıb. O qeyd edib ki, Birləşmiş Ştatlar da Ukraynadakı münaqişənin həlli yollarının axtarışında vasitəçilik səylərini davam etdirir.

Peskov müvafiq səyləri, o cümlədən Rusiya-Ukrayna danışıqları kontekstində çox vacib adlandırıb. O, həmçinin Rusiya tərəfinin münaqişənin siyasi və diplomatik yolla həllinə sadiqliyini qeyd edib: “Biz həmişə cənab Uitkoffu Moskvada görməyə və onunla əlaqələrimizə həmişə şadıq. Və biz belə görüşləri vacib, mənalı və çox faydalı hesab edirik”.

Qeyd edək ki, avqustun 3-də ABŞ prezidenti Uitkoffun avqustun 6-da və ya 7-də Moskvaya səfər edəcəyini açıqlamışdı. 

P.ƏMİRCANOV
XQ