Bu gün mayın 3 - də Heydər Əliyev mərkəzində Türkçülük günü münasibətilə Türkiyə Prezident Administrasiyasının Kommunikasiya idarəsinin təşəbbüsü ilə Azərbaycan və Türkiyə mediasının nümayəndələri ilə dəyirmi masa keçirilib. Görüşü Azərbaycanın Türkiyədəki səfirliyinin mətbuat xidmətinin rəhbəri Alptekin Cihangir İşbilir açaraq kütləvi informasiya vasitələrinin nümayəndələrini Türkçülük günü münasibətilə təbrik edib.
"Dildə, fikirdə, əməldə birlik" - Türk dünyasının gələcəyi panelində təşkil olunan dəyirmi masada çıxış edən Azərbaycan və Türkiyə mediasının peşəkar nümayəndələri qarşıdakı illərdə Türk Dövlətləri Təşkilatının media nümayəndələrinin birgə qurumunun yaradılması, Azərbaycan və Türkiyə kütləvi informasiya vasitələri arasında təcrübə mübadiləsi aparılması, Cənubi Qafqazda Zəfər qazanmış Azərbaycanın Orta Asiyanı, Türkiyəni birləşdirən mərkəz rolunu oynaması və Azərbaycan Türkiyə Media Platformasının yaradılması haqqında öz fikirlərini bildirdilər.
Dəyirmi masada Azərbaycan və Türkiyə mediasının peşəkar nümayəndələrindən Etibar Babayev, Umud Mirzəyev, Müşfiq Ələsgərli, Yadigar Məmmədli, Azər Həsrət, Akif Aşırlı, Aytən Qədimli, Ülviyyə Zülfüqar, Ramin Əliyev, Orxan Amaşov, Rufiz Hafizoğlu, Aqil Camal, Anadolu İnformasiya Agentliyinin və TRT - nin Azərbaycan nümayəndəliyinin rəhbərləri Azərbaycan Türkiyə Media birliyinin yaradılması ilə bağlı müzakirələrdə çıxış edərək öz mövqelərini bildirdilər.
Dəyirmi masadan sonra media nümayəndələri Türkiyə Cümhuriyyəti Cumhurbaşkanlığı Kommunikasiya İdarəsinin təşkilatçılığı ilə keçirilən "Dildə, fikirdə, əməldə birlik" - Türk dünyasının gələcəyi panelində iştirak etdilər.
Kəmalə ABDİNOVA
XQ
