Kreml mayın 9-da Moskvada keçiriləcək Qələbə Paradını işıqlandırmaq üçün xarici media nümayəndələrinə əvvəlcədən verilmiş akkreditasiyaları geri götürüb. Bu barədə Spiegel məlumat yayıb.

Nəşr qeyd edir ki, akkreditasiyanın ləğv edilməsi barədə redaksiyalara telefon vasitəsilə məlumat verilib. Spiegel-in məlumatına görə, Almaniyanın ARD və ZDF telekanallarının jurnalistləri, Sky News müxbiri, Fransanın AFP agentliyinin əməkdaşları, İtaliyanın Rai teleşirkəti və Yaponiyanın NHK nümayəndələrinin də akkreditasiyaları ləğv olunub.

Kremlin nümayəndəsi Spiegel-ə bildirib ki, “mövcud vəziyyətlə əlaqədar paradın işıqlandırılması formatı dəyişdirilib”. “Bu səbəbdən əvvəllər akkreditasiya almış xarici KİV nümayəndələri tədbirə buraxılmayacaq”, – deyə sitatda qeyd olunub. Akkreditasiyası ləğv edilən digər media qurumlarına isə Kremlin nümayəndəsinin “yalnız Rusiya mediasına giriş icazəsi verilib” sözləri çatdırılıb.

Spiegel yazır ki, bu, mayın 9-da Moskvada keçirilən bayram tədbirləri ilə bağlı ilk haldır ki, xarici media əvvəlcə Kreml tərəfindən akkreditasiya alıb, daha sonra isə həmin icazə geri götürülüb.

Rusiya rəsmiləri paradın xarici mediasız keçiriləcəyi ilə bağlı məlumatları şərh etməyiblər. Bundan əvvəl Rusiya prezidentinin mətbuat katibi Dmitry Peskov paradın formatında yeni dəyişiklik olmadığını bildirib. Onun sözlərinə görə, tədbir keçiriləcək, lakin daha əvvəl elan edildiyi kimi, hərbi texnika nümayiş olunmayacaq. “Ölməz Alay” aksiyası isə onlayn formatda təşkil ediləcək. Moskvada yeddi xarici nümayəndə heyətinin iştirakı gözlənilir.

S.ELAY

XQ